विश्व खाद्य कार्यक्रमबाट भूकम्पपीडितका लागि ल्याइएको दाल खानयोग्य

चितवन । कैफियतको आशङ्कामा रत्ननगरमा सिल गरिएको ठूलो परिमाणको दाल खानयोग्य रहेको जिल्ला खाद्य निरीक्षण इकाई चितवनले जानकारी दिएको छ । भूकम्पपीडितका लागि विश्व खाद्य कार्यक्रम (डव्लुएफपी) ले ल्याएको दाल कैफियत रहेको आशङ्कामा नमुना परीक्षण गरिएको थियो । परीक्षणपछिको प्रतिवेदनले बजारमा पाइने भन्दा केराउको दाल राम्रो पाइएको देखाएको छ । अघिल्लो महिना चितवनको रत्ननगरमा घुन लागेको भन्दै विश्व खाद्य कार्यक्रमले ल्याएको दाल प्रहरीले गोदाममै सिल गरेको थियो । नबिग्रिनका लागि राखिने माइकोटक्सिन विषादी १९ पीपीएम मात्रै भएकाले दाल खानयोग्य भएको प्रतिवेदनले देखाएको जिल्ला खाद्य निरीक्षक नवीन देउजाले बताए । खाद्य कार्यक्रमको केराउको दालमा गुणस्तर नपुगेको र घुन लागेको भन्दै फिर्ता पठाएको दाल रत्ननगरको निजी गोदाममा राखेको पाइएपछि प्रहरीले सिल गरेर अनुसन्धान थालिएको थियो ।