प्रतिनिधिसभा विघटन, फागुन २१ मा निर्वाचन

काठमाडौं। राष्ट्रपति रामचन्द्र पौडेलले नवनियुक्त प्रधानमन्त्री सुशीला कार्कीको सिफारिसमा प्रतिनिधिसभा विघटनको घोषणा गरेका छन्। कार्कीले प्रधानमन्त्री पदको शपथ लिएलगत्तै आफ्नो पहिलो कदमस्वरूप प्रतिनिधिसभा विघटनको सिफारिस गरेकी थिइन्, जसलाई राष्ट्रपतिले तत्कालै सदर गरेका हुन्।

यससँगै आगामी फागुन २१ गतेका लागि आम निर्वाचनको मिति तोकिएको छ। राष्ट्रपति पौडेलले प्रधानमन्त्री कार्कीको सिफारिसमा नै निर्वाचन मिति सार्वजनिक गरेका हुन्।

कार्की सोमबार र मंगलबार चलेको युवा पुस्ता (जेन–जी)को आन्दोलनको दबाबमा प्रधानमन्त्री बनेकी हुन्। सामाजिक सञ्जालमार्फत सुरु भएको छलफलपछि काठमाडौं महानगरपालिकाका मेयर बालेन्द्र शाहले समेत कार्कीको नाममा समर्थन जनाएका थिए।

शपथग्रहणपछि प्रधानमन्त्री कार्कीको अध्यक्षतामा बसेको पहिलो मन्त्रिपरिषद् बैठकबाटै संसद् विघटन गर्ने निर्णय भएको हो। मुलुकको लोकतान्त्रिक अभ्यासमा नवनियुक्त सरकारले पहिलो निर्णयमै प्रतिनिधिसभा भंग गर्नु दुर्लभ घटना मानिएको छ। अब देशको राजनीतिक भविष्य निर्वाचनमार्फत पुनः जनताकै हातमा सुम्पिएको छ।