विराटनगरबाट सुशीला कार्की छैटौँ प्रधानमन्त्री

काठमाण्डौ । नेपालको औद्योगिक तथा राजनीतिक सहर विराटनगरबाट नेपालले पहिलो महिला प्रधानमन्त्री पाएको छ । नेपालका प्रथम जननिर्वाचित प्रधानमन्त्री विश्वेश्वरप्रसाद कोइराला , मातृकाप्रसाद कोइराला, नगेन्द्रप्रसाद रिजाल, गिरिजाप्रसाद कोइराला, मनमोहन अधिकारीले विराटनगरलाई राजनीतिज्ञको उर्वर भूमिका रूपमा स्थापित गर्दै प्रधानमन्त्री भएर देशलाई नेतृत्व दिएका थिए । त्यही  विराटनगर महानगरपालिका वडा नम्बर ११ निवासी सुशीला कार्कीले भदौ २७ गते शुक्रबारदेखि  पहिलो महिला प्रधानमन्त्रीबनेकी छिन् ।

 धरान र विराटनगरमा लामो समयसम्म वकालत पेसामा संलग्न भएकी कार्की  इमानदार, निडर र हक्की स्वभावकी कानुन व्यवसायी को रुपमा परिचित छिन् । उनले कार्की एन्ड घिमिरे ल फर्मबाट कानुन व्यवसायको यात्रा सुरु गरेकी थिइन्  । धरानमा रहेर वकालत गर्दै गर्दा कार्कीले महेन्द्र बहुमुखी क्याम्पसमा २०४२ देखि ०४६ सालसम्म प्राध्यापनसमेत गरिन् । पञ्चायतकालीन समयमा उनले जिल्ला अदालतका अतिरिक्त अञ्चल र क्षेत्रीय अदालतमा समेत वकालत गरेकी थिइन्  ।

२०४६ सालको ऐतिहासिक जनआन्दोलनपछि अञ्चल र क्षेत्रीय अदालत खारेज गरिएर विराटनगरमा पुनरावेदन अदालत स्थापना भएसँगै कार्कीले विराटनगरमा आएर जिल्ला अदालत मोरङ र पुनरावेदन अदातलमा वकालत गरिन् । त्यही वकालत पेसाको कर्मशीलताको जगमा वरिष्ठ अधिवक्ताको हैसियत प्राप्त गरेकी कार्की सर्वोच्च अदालतमा इतिहास रच्दै मुलुककै पहिलो महिला प्रधान न्यायाधीश बनिन्  ।

आफ्नो पेसागत जीवनको सुरुवात धरान र विराटनगरमा वकालतबाट गर्दै गर्दा पूर्वी नेपालको कानुनी क्षेत्रमा दृढता, इमानदारी र न्यायप्रतिको लगावले उनिलाई छिट्टै नै विशिष्ट परिचय दिलाएको हो  ।