​​​​​​​ एक्सपर्ट कप फुटबलको उपाधि दी राइजिङ गोर्खाजलाई

तामाङ रिक्रेएसनल क्लब(टीआरसीसी)को आयोजना तथा एक्सपर्ट एजुकेशनको प्रायोजनमा सीडनीमा सम्पन्न फुटबल प्रतियोगिताको उपाधि दी राइजिङ गोर्खाजले जितेको छ । 

प्रतिस्पर्धात्मक फाइनलमा प्रतिद्धन्द्धी हिमालयन युथ क्लबलाई २-०ले पराजित गर्दै राइजिङ गोर्खाजले उपाधि जितेको हो । 
निकै उखरमाउलो गर्मीका बिच सम्पन्न फाइनलमा हिमालयन युथले मध्यान्तर अगाडि गोल गर्ने दुइ सुनौला अवसर चुकाएपछि दोस्रो हाफमा भने लय गुमाउदा हारको सामना गर्नु परेको थियो । 
प्रतियोगिताको उपाधि हात पारेको राइजिङ गोर्खाजले चार हजार डलर शिल्ड तथा प्रमाणपत्र हात पारेको छ भने हिमालयनले १५ सय डलर र शिल्ड प्राप्त गरेको छ । प्रतियोगितामा हिमालयनका टेनिस छन्त्याल उत्कृष्ट खेलाडी घोषित भए भने रुपक लामाले उच्च गोलकर्ताको उपाधि हात पारे । यस्तै राइजिङ गोर्खाजका नभिन केसी उत्कृष्ट गोलरक्षक साबित भए । ब्यक्तीगत उपाधि हात पार्ने खेलाडीले नगद तथा शिल्ड प्राप्त गरे ।  प्रतियोगिताका विजेताहरुलाई एनएसडब्लु राज्यका बाणिज्यदुत सन्जिव शर्मा, टीआरसीसीका संस्थापक अरुण तामाङ, नीम्फाका अध्यक्ष लक्ष्मण गुरुङ, नेपाली बास्केटबल टिमकी पुर्व कप्तान सदिना श्रेष्ठ,क्लबका अध्यक्ष ज्ञानक वाइबा, सचिब बैकुन्ठ डंगोलले शिल्ड पदक तथा प्रमाणपत्र बितरण गरेका थिए । बाणिज्यदुत सन्जिव शर्माले खेलकुद स्वास्थको लागि राष्ट्रको पहिचानका लागि समेत महत्वपुर्ण भएकोले यस्ता प्रतियोगिताहरु महत्वपुर्ण रहेको बताए ।