अष्ट्रेलियामा रहेका नेपाली कलाकार प्रदीप तिमल्सिनाको अभिनयमा हिन्दी म्युजिक भिडियो ‘मेरे यारा’ सार्वजनिक

क्यानबेरा। अष्ट्रेलियामा बसोबास गर्दै आएका नेपाली कलाकार प्रदीप तिमल्सिनाको अभिनय रहेको हिन्दी म्युजिक भिडियो ‘मेरे यारा’ सार्वजनिक भएको छ। प्रेम र रोमान्सको भाव समेटिएको उक्त भिडियोमा आकर्षक दृश्य, सुन्दर लोकेसन र कलाकारहरूको सशक्त प्रस्तुतिलाई समेटिएको छ।

भारतको राजधानी नयाँ दिल्लीका चर्चित तथा रमणीय स्थानमा छायांकन गरिएको भिडियोमा तिमल्सिनासँगै देहरादूनकी मिस उत्तराखण्ड स्मृति रावत मुख्य भूमिकामा देखिएका छन्। उनीहरूबीचको रोमान्टिक प्रस्तुतिले गीतको भावलाई दृश्यात्मक रूपमा जीवन्त बनाएको छ।

नितिन चन्दको निर्देशनमा तयार भएको ‘मेरे यारा’ एनसीएक्स स्टुडियोज इन्टरनेसनलको निर्माण हो। मुम्बईस्थित एफएमडी म्युजिकले सार्वजनिक गरेको यस भिडियोको छायांकन दिल्लीमा गरिएको हो। यसको निर्माण व्यवस्थापन लाइन प्रोड्युसर राजेन्द्र घिमिरेले सम्हालेका छन्।

घिमिरेले यसअघि ‘तेन्जिन’, ‘इन्डियन ३’ र ‘जेलर २’ लगायतका चलचित्रमा समेत काम गरिसकेका छन्। उनको अनुभवसहित नेपाल, भारत र अष्ट्रेलियाका कलाकार तथा प्राविधिकको सहकार्यमा भिडियो तयार गरिएको निर्माण पक्षले जनाएको छ।

अन्तर्राष्ट्रिय स्तरमा नेपाली कलाकारको उपस्थिति विस्तार गर्ने क्रममा तिमल्सिनाको यो अभिनयलाई अर्थपूर्ण रूपमा हेरिएको छ। नेपाली कलाकारले भारतीय मनोरञ्जन क्षेत्रमा समेत आफ्नो प्रतिभा प्रस्तुत गर्ने अवसरका रूपमा यस परियोजनालाई लिन सकिन्छ।

‘मेरे यारा’ अहिले एफएमडी म्युजिकको आधिकारिक युट्युब च्यानलमार्फत सार्वजनिक रूपमा हेर्न सकिन्छ।