अमेरिकामा बस्दै आएका जितेन्द्र श्रेष्ठ र मीना डुम्रे पाण्डेको स्वरमा ‘परदेशीको देउसी भैलो’ सार्वजनिक

सिड्नी । नेपाली मौलिक संस्कृति, परम्परा र चाडपर्वको महत्वलाई उजागर गर्दै नयाँ सांगीतिक प्रस्तुति ‘परदेशीको देउसी भैलो’ सार्वजनिक भएको छ। स्वारङ्गा ब्यान्डको प्रस्तुतिमा तयार भएको यस गीतले विशेषगरी विदेशमा रहेर पनि नेपाली भाषा, कला, संस्कृति र परम्परासँग जोडिइरहेका नेपालीहरूको भावना समेटेको छ।

गीतमा अमेरिकामा बसोबास गर्दै आएका गायक जितेन्द्र श्रेष्ठ र गायिका मीना डुम्रे पाण्डेको सुमधुर स्वर रहेको छ। प्रवासमा रहेर पनि नेपाली सांगीतिक क्षेत्र र मौलिक संस्कृतिसँग आफ्नो सम्बन्ध कायम राख्दै आएका श्रेष्ठ र पाण्डेको सहकार्यले गीतलाई विशेष बनाएको छ।

जितेन्द्र श्रेष्ठ र सुदीप पौडेलको शब्द रहेको गीतमा प्रसाद खप्तरी मगरले संगीत भरेका छन्। जितेन्द्र श्रेष्ठकै निर्देशनमा तयार भएको गीतले परदेशमा रहेका नेपालीहरूको देउसी–भैलोप्रतिको आत्मीयता, सम्झना र सांस्कृतिक लगावलाई सांगीतिक माध्यमबाट प्रस्तुत गरेको छ।

गीतको रेकर्डिङ सागर बजुराली र श्याम नेपालीले गरेका छन् भने मिक्सिङ खडक बजुरालीले गरेका हुन्। संगीत सम्पादन राजेन्द्र बजुरालीको रहेको छ। सिनेमाटोग्राफी सिन्धु पोखरेल र जीत चोपडाले गरेका छन्।

नेपाल तथा अमेरिकामा रहेका कलाकार र प्राविधिकहरूको सहकार्यमा निर्माण भएको यस गीतले नेपाली कला र संस्कृतिको प्रवर्द्धनमा प्रवासी नेपालीहरूको योगदानलाई समेत उजागर गरेको छ।

नेपालीहरूको महान् सांस्कृतिक पर्व देउसी–भैलोको मौलिकता र परदेशमा रहेका नेपालीको भावनालाई जोड्ने प्रयास गरिएको ‘परदेशीको देउसी भैलो’ अहिले दर्शक तथा श्रोतामाझ आएको छ।

प्रवासको माटोमा रहे पनि नेपाली मन र संस्कृतिप्रतिको माया उस्तै हुन्छ भन्ने सन्देश बोकेको यस गीतले नेपाली सांगीतिक क्षेत्रमा आफ्नो छुट्टै पहिचान बनाउने अपेक्षा गरिएको छ।

🎬 ‘परदेशीको देउसी भैलो’ को पूरा भिडियो हेर्न तलको लिंकमा क्लिक गर्नुहोस्।

https://youtu.be/X4lAMN7bd9k?si=a8J8pvopKNg9uUll