शुन्य मतदान भएको थवाङमा, सुझाव संकलन हुन सकेन

रोल्पा, । संविधानको मस्यौदामाथी छलफल गर्न गाउँ–गाउँमा सुझाव पठाइएको भएपनि रोल्पाको थवाङमा छलफलै नभइ मस्यौदा फिर्ता भएको छ । दोस्रो संविधानसभाको निर्वाचनमा शुन्य मतदान गरेका थवाङबासीले संविधानको मस्यौदामा पनि सुझाव शुन्य गराएका छन् । सुझाव संकलनको लागि गएका गाविसका कर्मचारी रित्तो फर्केका छन् । शनिबार बिहान १० बजे देखि ५ बजे सम्म छलफल कार्यक्रमको आयोजना गरिएको भएपनि कोहि पनि नआए पछि मस्यौदा प्रहरीलाई बुझाएर फर्किएका छन् । चन्द नेतृत्वको माओवादी पकड रहेको थवाङमा नयाँ संविधानमा पनि कुनै सुझाव नदिने बताएका छन् । चुनावमा भोट पनि हालिएन सुझाव पनि दिदैनौ भन्दै कर्मचारीलाई रित्तो फर्काएका छन् । शसस्त्र युद्धको उद्गम थलो मानिएको थवाङ बिगत देखि सत्ता पक्षको विपक्षमा रहदै आएको छ । अब बन्ने नयाँ संबिधानमा पनि कुनै राय सुझाव नदिने वाचा गरेका छन् । त्यहि पुरानो संविधानलाई जस्ताको त्यस्तै ल्याउने खेल भइरहेको भन्दै नेकपा माओवादीले विरोध गर्दै आएको छ । नाम मात्र परिवर्तन गरि उही पुरानो संविधानलाई ब्यूताउने खेल भइरहेकोले त्यसमा सहभागी नहुने नेकपा माओवादीका जिल्ला सह(सेक्रेटरी प्रतापले बताए । मस्यौदा बोकी थवाङ पुगेका गाविस सचिव १ वटा पनि सुझाव नलिई सदरमुकाम फर्किएका छन् । बिनम्रता पूर्वक आग्रह गर्दा पनि उनीहरू सहभागी नभएपछि मस्यौदा प्रहरीलाई बुझाएर फर्किएको उनले बताएका छन् । मस्यौदा बोकी गाउँ–गाउँ गएका टोली माथी चन्द माओवादीले अबरोध गर्ने प्रयास गरिरहेको छ । शनिबार मात्र बुढागाउँमा मस्यौदा संकलन टोलीलाई कालो झण्डा देखाइदिएको छ । संविधान निर्माण प्रकृयामा असहमति जनाउदै आईरहेको माओवादीले शनिबार सुझाव संकलनका लागि भन्दै गाउँ गएका सुझाव संकलकलाई कालो झण्डा देखाएको हो । नेकपा माओवादी गाउँ कमिटी सेक्रेटरी जगजितको नेतृत्वमा रहेको टोलीले कोलो झण्डा देखाएको सुझाव संकलन गर्न खटिएका कर्मचारीले बताएका छन् । २०४७ सालकै संविधानलाई मजबुद बनाउने काम हुन थालेको भन्दै कालो झण्डा देखाएको उनीहरुले बताएका छन् । विगतामा भएका सहमति विपरित संविधान निर्माण हुन थालेको भन्दै नेकपा माओवादीले विरोध जनाउदै आएको छ ।