क्रियाशील सदस्यता विवाद टुंगो नलाग्दा कांग्रेस महाधिवेशन तयारी सुस्त

काठमाडौं । क्रियाशील सदस्यता नवीकरण तथा वितरणमा उत्पन्न विवाद टुंगो नलाग्दा कांग्रेसको १३ औं महाधिवेशन तयारी सुस्त गतिमा अघि बढेको छ । राजधानीमा असोज २ देखि ५ सम्म महाधिवेशन गर्ने निधो भइसकेको छ । क्रियाशील सदस्यताको छानबिन नसकिएकाले महाधिवेशनको तयारी बैठक हुन सकेको छैन भने नेता तथा कार्यकर्ताको चहलपहलसमेत छैन । भावी नेतृत्वमा पकड राख्न क्रियाशील सदस्यता वितरण तथा नवीकरणदेखि नै होडबाजी चलेको हो । आधाभन्दा बढी जिल्लामा विवाद देखिएको छ । १४ जिल्लामा गम्भीर विवाद छ । क्रियाशील सदस्यता विवाद छानबिन गर्न गठित केन्द्रीय सदस्य एवं मन्त्री नरहरि आचार्यको समितिले काम गरिरहेको छ । समितिले कार्यकर्ताहरूको सम्भावित दबाब र घेराबन्दी छल्न गोप्य रूपमा छानबिन प्रक्रिया अघि बढाएको छ । समितिका सदस्यहरू कहिले धुलिखेल त कहिले महाराजगन्जस्थित एक निजी घरमा बसेर काम गरिरहेका छन् । कतिपय विवाद राजनीतिक खालका छन् भने कतिपय नियम र प्रक्रिया मिचेका विषयसँग सम्बन्धित छन् । पार्टी केन्द्रीय कार्यसमितिको निर्देशन र नियमावली विपरीत बाँडिएका र नवीकरण गरिएका सदस्यलाई मान्यता नदिने गरी छानबिन समितिले टुंग्याउन खोजेको स्रोतले बतायो । नुवाकोट, धनुषा, रौतहट, महोत्तरी, सिरहा, सप्तरी, दोलखा, रामेछाप, भक्तपुर, कास्की, पर्सा, नवलपरासी, बागलुङ र सिन्धुपालञ्चोकमा बढी विवाद देखिएको छ । नियमअनुसार केन्द्रले जिल्ला, जिल्लाले क्षेत्र, क्षेत्रले गाउँ र गाउँले वडा तहलाई फारम दिएर सदस्यता वितरण तथा नवीकरण गर्नुपर्ने व्यवस्था छ । क्रियाशील सदस्यता शतप्रतिशत बढाउने पार्टीको नीतिले पनि विवाद निम्ताएको छ । १२ औं महाधिवेशनको तुलनामा शतप्रतिशत क्रियाशील सदस्यता संख्या बढाउने गरी यसपटक नवीकरण र नयाँ वितरण अभियान थालिएको थियो । प्रत्येक जिल्लामा कायम क्रियाशील सदस्य बराबरै नयाँ वितरण भएका छन । यो हिसाबले करिब ६ लाख क्रियाशील सदस्य पुग्ने छानबिन समितिका सदस्य रामकृण्ण यादवले बताए । १२ औंं महाधिवेशनमा यो संख्या ३ लाख १७ हजार थियो । यादवले क्रियाशील सदस्यताको सम्पूर्ण छानबिन सकेर साउनको पहिलो साताभित्र केन्द्रीय कार्यसमितिलाई बुझाइने बताए । ‘विधान र नियमावलीअनुसार प्रक्रिया नमिलाई सदस्यता वितरण तथा नवीकरण गरिएका मुद्दालाई प्राथमिकता दिएर छानबिन सुरु भएको छ । ‘कतिपय राजनीतिक विषय पनि छन्,’ उनले भने, ‘साउनको पहिलो साताभित्रै हामीले काम सम्पन्न गर्छौं ।’ उनले साउनको पहिलो साताभित्र क्रियाशील सदस्यताको छानबिन सम्पन्न हुँदा स्थानीय तह र केन्द्रीय महाधिवेशनको तिथिलाई कुनै असर नपार्ने बताए । कांग्रेसका नगर वडा, गाउँ र नगर अधिवेशन ०७२ भदौ १ गते, निर्वाचन क्षेत्रीय अधिवेशन ०७२ भदौ ७ र जिल्ला अधिवेशन ०७२ भदौ १० सम्पन्न गर्ने कार्यतालिका छ । क्रियाशील सदस्यताको प्रभाव केन्द्रीय महाधिवेशनसम्म पर्ने गर्छ । क्रियाशील सदस्यहरू गाउँ अधिवेशनमा मतदाता हुन्छन् । गाउँ अधिवेशनले चुनेर पठाउने क्षेत्रीय प्रतिनिधिले महाधिवेशन र महासमिति सदस्य छनोट गर्छन् ।