संविधानको पहिलो मस्यौदामा तीन हजार पाँच सय बढी सुझाव प्राप्त

काठमाडौँ । जनताको सुझाव सङ्कलनका लागि स्थानीय तहमा पुगेको संविधानको पहिलो मस्यौदामा हालसम्म तीन हजार ५०० भन्दा बढी सुझाव प्राप्त भएको छ । नागरिक सम्बन्ध तथा संविधान सुझाव समितिले आज सिंहदरबारमा पत्रकार सम्मेलनको आयोजना गरेर टोल फ्री नम्बरबाट एक हजार ५० र वेभसाइटमार्फत एक हजार ५०० सुझाव प्राप्त भएको जानकारी दियो । यस्तै, इमेलबाट एक हजार ११० तथा फ्याक्सबाट २८ वटा र हुलाकमार्फत सचिवालयमा १६ वटा सुझाव प्राप्त भएका छन् । वेभसाइटबाट प्राप्त भएका सुझावमध्ये विदेशबाट प्राप्त ५४३ सुझाव रहेका छन् । प्राप्त भएका सुझावलाई प्रतिवेदनको ढाँचामा वर्गीकरण गर्ने कार्य आजैदेखि सुरु गरिएको जानकारी दिँदै समितिका सभापति प्रमिला राणाले शुक्रबारदेखि संविधानसभाका सदस्यहरू जनमत सङ्कलनका लागि प्रस्थान गर्ने बताइन् । संविधानसभा सदस्य सम्बन्धित क्षेत्रमा पुगेपछि संविधानको मस्यौदाको प्रचार प्रसार र सुझाव सङ्कलनको कार्यले थप उचाइ लिने विश्वास समितिले लिएको छ । आगामी साउन ४ र ५ गते सञ्चालन हुने सुझाव सङ्कलनमा जनताको व्यापक सहभागिता हुने भन्दै समितिले संविधान निर्माणको महत्वपूर्ण कार्यमा सहभागी हुन जनतामा आह्वानसमेत गरेको छ । समितिले नेपाल राजपत्रमा पाँच हजार, संविधानको मस्यौदा पुस्तकका रूपमा दुई लाख, मस्यौदाको विशेषता एक लाख र मस्यौदाको पूर्ण अंश गोरखापत्रमा दुई लाख ५० हजार छपाइ गरी कुनै न कुनै रूपमा स्थानीय तहसम्म पु¥याएको छ । यही असार २५ गतेदेखि संविधानसभा सचिवालयका १५० जना कर्मचारीले २४० वटै निर्वाचन क्षेत्रमा मस्यौदा वितरण र प्रचार प्रसारको काम गरिरहेका छन् । सुझाव सङ्कलनको कामलाई अनुगमन र समन्वय गर्न संविधानसभा सचिवालयका महासचिव मनोहरप्रसाद भट्टराईको नेतृत्वमा केन्द्रीय अनुगमन तथा समन्वय समिति गठन गरिएको छ भने सहसचिवहरूको नेतृत्वमा पाँच विकास क्षेत्र समेट्ने गरी अनुगमन टोली बनाइएको छ । समितिले संविधानको मस्यौदामा रचनात्मक सुझाव दिन पुनः नेपाली नागरिकमा आह्वानसमेत गरेको छ ।