संविधानको मस्यौदा लेखन नरोक्न कृष्ण सिटौलाको रुलिङ

काठमाडौं । सर्वोच्च अदालतको अन्तरिम आदेशपछि पनि नयाँ संविधानको मस्यौदा लेखन रोकिएन । मस्यौदा समितिको शनिबारको बैठकमा सदभावनाका सभासद नरसिंह चौधरीले संविधानको मस्यौदा लेखन रोक्न माग गरेका थिए । सर्वोच्च अदालतले अन्तरिम संविधानको १, ८२ र १३८ विपरित काम नगर्न अन्तरिम आदेश आएको भन्दै उनले प्रदेशहरुको नामांकन र सीमांकन विनाको संविधान निर्माण गर्नु आदेश विपरित हुने बताए । सर्वोच्चले शुक्रबार अन्तरिम संविधानको धारा १, ८२ र १३८ विपरित काम नगर्न अन्तरिम आदेश दिँदै चार दलबीच भएको १६ बुँदे सहमति कार्यान्वयमा रोक लगाएको थियो । तर, मस्यौदा समितिका सभापति कृष्ण सिटौलाले नयाँ संविधानको मस्यौदा लेखन कार्यलाई निरन्तरता दिने रुलिङ्ग गरेका छन् । सभापतिको रुलिङपछि सदभावनाका सभासद चौधरीले सर्वोच्चको आदेशलाई सम्मान गर्नु पर्ने भन्दै मस्यौदा समितिको वैठक बहिस्कार गरेका छन् ।