भुकम्पले भत्किएका चितवनका बिद्यालयमा त्रिपालमै पढाइ सुरु

रत्ननगर । भूकम्पले भत्किएका विद्यालयमा त्रिपालमै पढाइ सुरु भएको छ । गत वैशाख १२ गते आएको विनाशकारी भूकम्प र २९ गते आएको ठूलो पराकम्पनपछि पुनः बन्द गरिएका चितवनका विद्यालयमा त्रिपालमै विद्यार्थीलाई पढाइ सञ्चालन गरिएको चितवनका जिल्ला शिक्षा अधिकारी दामोदर आचार्यले जानकारी दिए । उनका अनुसार जिल्लाका २६ विद्यालयमा त्रिपालमा पढाइ सुरु भइरहेको छ । जिल्लाका २९ विद्यालय भत्किएकाले भवन निर्माण नभएसम्म त्रिपालमै पढाइ हुने उनले बताए । तीन विद्यालय राप्रावि वासवाङ, कालिका राप्रावि चात्राङ लोथर र राप्रावि डिहिटारलाई अझै त्रिपाल पुगेको छैन । ती विद्यालयमा पनि छिट्टै त्रिपाल पठाइने कार्यालयले जनाएको छ । त्रिपालमा पढाइ हुने राष्ट्रिय प्राथमिक विद्यालयमा कविलासको भार्लाङ र देविभञ्याङ, डुंडे दारेचोक, डुङवाङ र गुन्दी लोथर, दारेचोकको धुसा, सिदी गाविसका तीनवटा प्रावि र एक मावि तथा शक्तिखोरका विभिन्न विद्यालय रहेका छन् । उच्च मावि, निमावि र मावि गरेर ६ वटामा त्रिपाल वितरण भएको जिल्ला शिक्षा कार्यालय चितवनले जनाएको छ । ती विद्यालयलाई गैरसरकारी संस्था, लायन्स क्लब, परिवर्तन नेपाल र जिल्ला शिक्षा कार्यालयले त्रिपाल उपलब्ध गराएको हो । चितवनको सिद्धिको राष्ट्रिय मावि मझवाङका प्रधानाध्यापक देवकुमार बस्नेतले विद्यार्थीमा भूकम्पको मनोवैज्ञानिक त्रास कायमै रहेकाले परामर्शसमेत दिने गरिएको बताए । सो विद्यालयमा ९० प्रतिशतभन्दा बढी चेपाङ बालबालिका पढ्छन् ।