थुनिएको कालिगण्डकीबाट पानी ओभरफ्लो भएर बग्ल थाल्यो

काठमाडौं । बेनी–मुस्ताङ सडकखण्डको भगवती गाविसअन्तर्गत बैसरीमा राति २ बजे आएको ठूलो पहिरोले थनिएको कालीगण्डकी नदीमा पानी ओभरफ्लो भएर बग्न थालेको छ । नेपाली कांग्रेस म्याग्दीमा सभापति एंव सभासद् रेशमबहादुर बानियाँका अनुसार पहिरोले थुनिएको तालबाट पानी ओभरफ्लो भएर बग्न थालेको हो । पहिरोले बनेको ड्याम लगभग दुईसय मिटर अग्लो छ । म्याग्दीको भगवती र राम्चे गाविसको सिमामा पर्ने बैसरीमा कालीगण्डकी नदी पूरै थुनिएको हो । पहिरो गएर थुनिएको कालीगण्डकीमा बनेको तालको आकार बढ्दै गएपछि सरकारले तल्लो तटका सबैभन्दा जोखिमपूर्ण वस्तीहरुको पहिचान गरेको छ । पश्चिमाञ्चल क्षेत्रीय प्रशासक दिनेश थपलियाका अनुसार ती गाउँका वासिन्दालाई सतर्क गराउँदै सुरक्षीत स्थानमा सर्न भनिएको छ । प्राविधिकहरुले तालको अध्ययन गरेर उपाय नसुझाएसम्म प्रशासनले म्याग्दीदेखि स्याङ्जाको मिर्मीसम्मको पन्ध्र गाउँलाई सबैभन्दा संवेदनशिल भनिएको छ । म्याग्दी, बाग्लुङ, पर्वत र स्याङ्जाका पन्ध्र गाउँलाई अत्याधिक संवेदनसिल भनिएको छ । गलेश्वर, बेनी, पर्वत बेनी, लुम्दी, फर्से, लस्दी, खनियाघाट, निरय, मालढुंगा, सहस्रधारा, नयाँ पुल, मोदी बेनी, पूर्तीघाट, सेती बेनी र मिर्मीका बासिन्दालाई धेरै सतर्क रहन भनिएको छ । काठमाडौंबाट विशेषज्ञ टोली लिएर म्याग्दी गएको हेलिकोप्टर घटनास्थलभन्दा १ किलोमिटर माथि बनाइएको हेलिप्याडमा अवतरण भएको छ । म्याग्दी जिल्ला प्रहरी कार्यालयका अनुसार हेलिकोप्टर अवतरण गरेपनि घटनास्थलसम्म जान सकिएको छैन । चट्टान झर्ने क्रम अझै पनि नरोकिएकाले नेपाली सेनाको हेलिकोप्टरले हवाई अवलोकन गरेपनि घटनास्थल पुग्न सकेको छैन । यसैबीच गृहमन्त्री बामदेव गौतम कालिगण्डकी थुनिएको क्षेत्रको निरिक्षण गरेर फर्केका छन् । विस्फोट गराएर पहिरो खुलाउन गृहमन्त्री वामदेव गौतमले दिएको निर्देशन पालना गर्न नसकिने नेपाली सेनाले जनाएको छ । शनिबार राति गएको पहिरोपछि कालिगण्डकी थुनिँदा बनेको ताल तथा त्यसक्षेत्रको हवाई अनुगमनपछि आइतबार गृहमन्त्री गौतमले विस्फोट गराएर पहिरो क्लियर गर्न स्थानीय प्रशासनलाई निर्देशन दिएका थिए । गौतमले सिन्धुपाल्चोकको जुरेमा गएको पहिरो हटाउँदाको उदाहरण दिँदै त्यसरी नै हटाउनुपर्ने बताएका थिए । तर गृहमन्त्रीलाई पहिरो गएको क्षेत्रको ब्रिफिङ गर्ने क्रममा नेपाली सेनाका अधिकारीले त्यसको सम्भावना नरहेको बताए । अहिले त्यस क्षेत्रमा ठूलो पानी पर्न थालेपछि झन् समस्या थपिएको छ । स्थलगत अनुगमनको सम्भावना नभएपछि गृहमन्त्री गौतमले हेलिकप्टरबाट नै पहिरो गएको क्षेत्र अनुगमन गरेका थिए । नेपाली सेनाले पहिरो रोकिएको ८÷१० घण्टापछिमात्र पहिरो हटाउने काम सुरु गर्न सकिने बताएको छ । पहिरोका कारण म्याग्दी जोमसोम सडक डुबानमा परेको छ । बैसेरीका १७ र राम्चेका १२ घरपरिवार विस्थापित भएका छन् ।