भविष्यप्रति ठूलो भरोसा छ : प्रधानमन्त्री कोइराला

काठमाडौं । प्रधानमन्त्री सुशील कोइरालाले आफूलाई भविष्यप्रति ठूलो भरोसा भएको बताएका छन् । आज बिहान निवास बालुवाटारमा ज्ञापनपत्र बुझाउन आएका ३३ दलीय मोर्चाका प्रतिनिधिसँग प्रधानमन्त्री कोइरालाले समस्त नेपाली एक भए कसैको डर नहुने तर विभाजित भए खतरा हुने बताए । उनले आफुलाई भविष्यप्रति ठूलो भरोसा रहेको समेत बताए । उनले प्राकृतिक विपद्ले जनधनको ठूलो नोक्सान भए पनि सबै नेपाली एकताबद्ध भएमा यसलाई विकासको नयाँ युगको सुरुवातमा बदल्न सकिने सम्भावना पनि औँल्याए । उनले भने–‘मुलुकमा शान्ति र स्थायित्वमात्र दिन सकियो भने नेपालमा लगानी गर्न भारत र चीनलगायतका धेरै मित्रराष्ट्रहरु तयार छन् । विकासको अवसर गुमेका छैनन् ।’ प्रधानमन्त्रीले हालैको भूकम्पले गरेको विनाश ठूलो चुनौती भएको उल्लेख गर्दै यसको सामना गर्न सवै एकैठाँउ हुनुपर्ने बताए । उनले राष्ट्रियता लोकतन्त्र र विकासका निम्ति एक भए कसैले परास्त गर्न नसक्ने बताए । सबै एकताबद्ध भएर गए मुलुकका समस्या समाधान हुने र सबै सफल हुने प्रधानमन्त्री कोइरालाको भनाई थियो । प्रधानमन्त्री कोइरालाले मुलुक विपत्तिमा परेका बेलामा सबै नेपालीको भावनालाई समेटेर राष्ट्रिय सरकारको गठन गर्न आफू तयार रहेको पनि बताए । स्थानीय समस्या समाधान गर्न र स्थानीय आवश्यकतानुसार विकासका काम सञ्चालन गर्न स्थानीय निकायको निर्वाचन अपरिहार्य देखिएको बताउँदै प्रधानमन्त्री कोइरालाले स्थानीय निकायमा जनप्रतिनीधि भएको भए यस्तो विपत्तिको समयमा खोजी, उद्धार र राहत कार्यक्रम अझ प्रभावकारी हुने आफुलाई महसुश भएको स्पष्ट पारे । संविधानसभाको निर्वाचनमा सहभागी नभएका र संविधानसभामा प्रतिनिधित्व नभएका ३३ दलका तर्फबाट विभिन्न २१ बुँदे ज्ञापनपत्र प्रस्तुत गरिएको थियो । सो ज्ञापनपत्रमा राष्ट्रिय सरकारको गठनसहित स्थानीय निकायको निर्वाचन, प्रभावकारी राहत वितरण, उपयुक्त पुनःस्थापना र पुनःनिर्माण नीति र कार्यक्रम, भूकम्पबाट क्षति भएका सार्वजनिक विद्यालय, स्वास्थ्य संस्था, सार्वजनिक भवन, सडक र व्यक्तिगत भवनको निर्माण कार्यलाई सुव्यवस्थित ढङ्गले छिटो गर्नुपर्नेजस्ता विषयहरु समेटिएका छन् । प्रधानमन्त्री कोइरालाले मनसुनअगावै भूकम्पपीडितका लागि अस्थायी आवास बनाउने कार्यलाई सरकारले उच्च प्राथमिकता दिएको र स्वयम्सेवी परिचालनलाई तीव्र पारिएको बताए । उनले विपद्को समयमा सबैलाई एकजुट भएर पीडितहरुको सेवामा लाग्न पनि सवैलाई आग्रह गरेका थिए ।