भूकम्पको पराकम्पन कम भएसँगै जनजीवन सामान्य हुदै

काठमाडौं । भूकम्पको पराकम्पन कम भएसँगै उपत्यकासहित प्रभावित क्षेत्रको जनजीवन सामान्य बन्दै गएको छ । अघिल्ला दिनका तुलनामा पराकम्पन कम हुँदै गएपछि उपत्यकामा चहलपहल बढेको छ । सडकमा मानिसको चहलपहल बढेको छ भने पसलहरु क्रमशः खुल्न थालेका छन् । उपत्यकाभित्र सवारीसाधन सामान्य रुपमा सञ्चालन हुन थालेको महानगरीय ट्राफिक प्रहरी महाशाखाले जनाएको छ । यसैबीच आज बिहान दुईवटा पराकम्पन मात्र गएको भुकम्प मापन केन्द्रले जनाएको छ । दोलखालाई केन्द्रबिन्दु बनाएर आज बिहान ३ बजेर ३८ मिनेट जाँदा ४.१ र ४ बजेर ६ मिनेट जाँदा ४.३ रिक्टर स्केलको भूकम्पको पराकम्पन गएको राष्ट्रिय भूकम्प मापन केन्द्रले जनाएको छ । पराकम्पनहरु क्रमिक रुपमा कम हुँदै गएकाले अब आत्तिनुपर्ने अवस्था नरहेको केन्द्रले जनाएको छ । काभ्रेपलाञ्चोक, दोलखा र रसुवालाई केन्द्रबिन्दु बनाएर बिहीबार साँझसम्म चार रिक्टर स्केलभन्दामाथिका नौ वटा भूकम्पका पराकम्प महसुस भएका थिए ।