फेरि शक्तिशाली भूकम्पको धक्का, अहिले सम्म ६५ को मृत्यु, राती फेरि तीन धक्का

काठमाडौं । काठमाडौं र उपत्यका आसपासका जिल्लाहरुमा शक्तिशाली भूकम्प गएको छ । १२ बजेर ५२ मिनेटमा ७.३ रेक्टर स्केलको भूकम्प गएको हो । अमेरिकी भूगर्भ विभागले सुरमा ७.१ भनेको थियो । तर, पछि ७.३ रेक्टर स्केलको भएको बताएको छ । भूकम्पको केन्द्र केन्द्र दोलखाको सुनखानी भएको बताइएको छ । भूकम्पपछि लगातार पराकम्पन गएको छ । ५.६, ५.५ र ६.२ रेक्टर स्केलको भूकम्प गएको छ । भूकम्पपछि मानिसहरु घरबाट बाहिर आएका छन् । वैशाख १२ गतेको ७.८ रेक्टर स्केलको विनोशकारी भूकम्पले त्रसित मानिसहरु फेरि भूकम्प गएपछि त्रसित भएका छन् । मंलबार दिउँसो गएको भूकम्पका कारण ६५ जनाको ज्यान गएको गृह मन्त्रालयले जनाएको छ । एक हजार ९ सय २८ जना घाइते भएका छन् । मन्त्रालयका अनुसार क्षतिको विवरण संकलन भैरहेको छ । मंलबार दिउँसो गएको भूकम्पले दोलखा, सिन्धुपाल्चोक र रामेछापमा सबैभन्दा धेरै क्षति पुगेको छ । तर, विज्ञहरुले भने ठूलो धक्कापछि केही समयसम्म धक्का महसुस भइरहेका बताएका छन् । वैशाख १२ पछि आएको यो दोस्रो ठूलो भूकम्प हो । वैशाख १२ गते ७.८ रेक्टर स्केलको भूकम्प आएको थियो । त्यसपछि आएका अनिगिन्ती धक्कामध्ये सबैभन्दा ठूलो ६.९ रेक्टर स्केलको थियो । आजको भूकम्प ७।३ रेक्टर स्केल रहेको भूकम्प मापन केन्द्रको सूचनामा देखिएको छ । आजको भूकम्पबाट राजधानीबासीहरु वैशाख १२ मा जस्तै त्रसित देखिएका छन् । भूकम्पको धक्कासँगै राजधानीबासीहरु सडकमा निस्किएका छन् । पसलहरु एकाएक बन्द भएका छन् । पहिलो धक्कापछि सानातिना पराकम्पहरु पनि आउने क्रम रोकिएको छैन । भूकम्पको क्षतिको विवरण आइसकेको छैन ।