तीनदल संसदमा लैजाने संकल्प प्रस्तावको तयारीमा

काठमाडौं । भूकम्पबाट सिर्जित राष्ट्रिय विपत्तिको घडीमा जनसहयोग तथा पुनःस्थापनाको साथै भौतिक संरचनाको पुनः निर्माणबारे व्यवस्थापिका संसद्को आगामी बैठकमा प्रस्तुत गर्ने संकल्प प्रस्ताव तयारीमा प्रमुख तीन जुटेका छन् । भूकम्प प्रभावित संरचनाको पुनः निर्माण र पुनः स्थापनाको कार्यमा कसरी जुट्ने भन्नेबारे दलहरुबीच छलफल चलिरहेको र आज अपराह्न ४ वजे मुख्य दलका शीर्ष नेताहरुको बैठक बसेर खाका तयार गरी सभामुखसमक्ष प्रस्तुत गर्ने बताइएको छ । प्रधानमन्त्री निवास वालुवाटारमा मंगलवार साँझ सत्तारुढ नेपाली काँग्रेस र नेकपा एमाले तथा प्रमुख प्रतिपक्षी दल एमाओवादीका शीर्ष नेताहरुबीच संकल्प प्रस्तावका बिषयमा केन्द्रित रहेर छलफल भएको थियो । बैठकमा सहभागी नेकपा एमालेका उपाध्यक्ष भीम रावलले तीन दलको बैठकमा भूकम्प प्रभावित जनताका आवश्यकता सम्बोधन र भौतिक संरचनाको पुनः निर्माणबारे छलफल भएको जानकारी दिए । तीन दलको बैठमा तीनवटै दलका नेताले संकल्प प्रस्तावमा समेटिनुपर्ने विषयबारे दलगत धारणा प्रस्तुत भएको बताए । नेपाली काँग्रेसका सह महामन्त्री पूर्णबहादुर खड्काले राष्ट्रिय विपत्तिका बेला संसद् एक ठाउँमा उभिएर सङकटको सामना गर्ने खालको सङ्कल्प प्रस्ताव तयार गर्नेबारे तीन दलबीच विचारविमर्श भएको बताए । व्यवस्थापिका–संसद्को आगामी बैठक यही वैशाख २४ गते अपराह्न ३ बजे बस्ने छ ।