संविधानसभा बैठक फेरि केही दिनका लागि स्थगित हुने

काठमाडौँ । पूर्व सांसद् सलिम मियाँ अन्सारीको निधनका कारण संविधानसभाको सोमबारको बैठक कार्यसूचीमै प्रवेश नगर्ने भएको छ । एमाओवादी सहितका प्रतिपक्षी दलहरुले संविधानसभाको प्रक्रिया पर सार्न दवाव दिइरहेका बेला संविधानसभाको लगातारको दोस्रो बैठक पनि शोक प्रस्तावमा मात्र सिमित हुन लागेको हो । यसअघि चैत २३ मा बसेको संविधानसभाको बैठक पूर्व सभासद् रामनाथ ढकाल र पूर्व सांसद महेन्द्र यादवको निधनप्रति शोक प्रस्ताव पारित गरी सोमबारसम्मका लागि स्थगित भएको थियो । शोक प्रस्ताव परित गरेको बैठक अन्य कार्यसूचीमा प्रवेश नगर्ने संसदीय अभ्यास छ । संविधानसभा अध्यक्ष सुवासचन्द्र नेम्वाङले सोमबारको बैठकपछि थप केही दिन संविधानसभा स्थगित गर्ने संभावना छ । दलहरुबीच नयाँ संविधानका विवादीत अन्तरवस्तुमा सहमति जुट्ने अपेक्षामा उनले बैठकको कार्यसूची तय गरेका छैनन् । उनले दलहरुबीच सार्थक संवाद सुरु भएमा सहमतिका लागि थप समय उपलब्ध गराउने बताउँदै आएका छन् । यसअघि एक साताका लागि बैठक स्थगित गरेको नेम्वाङले दलहरुलाई अन्तिम मौका स्वरुप तीनरचार दिन समय दिने संभावना रहेको संविधानसभा सचिवालय स्रोतले जनाएको छ । संविधानसभाको अर्को बैठक अघि सम्म संविधानका विवादीत अन्तरवस्तुमा सहमति जुटाउन उच्च राजनीतिक तहको छलफल तिब्र भएको छ । प्रधानमन्त्री सुशील कोइराला र नेम्वाङबीचको छलफल पछि आइतबार नेम्वाङ र एमाओवादी अध्यक्ष पुष्पकमल दाहालबीच कुराकानी भएको थियो । संविधान निर्माणको गतिरोध तोड्ने विषयमा दुबै छलफल सकारात्मक रहेको बताइएको छ । ‘संविधानसभाको बैठक अघिको समयलाई सदुपयोग गर्नुहोस भन्ने मेरो निरन्तरको आग्रह छ,’ नेम्वाङले भने–‘छलफल धेरै भए अब निर्णय गर्नुपर्छ । हामीसंग धेरै समय बाँकी छैन ।’ उनले सोमबारका लागि प्रमुख दलका नेताहरुको शीर्ष बैठक डाक्ने तयारी पनि गरेका छन् । नेम्वाङसंगको भेटमा एमाओवादी अध्यक्ष दाहालले दलहरुबीचको सहमति पछिका लागि मात्रै संविधानसभाको बैठक बोलाउन आग्रह गरेको उनका स्वकीय सचिव चुडामणी खडाले बताए । प्रस्ताव समिति गठन मार्फत गत माघ ११ देखि सुरु भएको बहुमतिय प्रक्रियामा एमाओवादी सहितका प्रतिपक्षी दलहरु सहभागि छैनन् । शोक प्रस्तावमा मात्र केन्द्रीत हुने निश्चित भएपछि चैत २३ को बैठकमा भने एमाओवादी सहितका प्रतिपक्षी दल सहभागि थिए । संविधानसभामा गत माघ ११ गते सुरु भएको बहुमतिय प्रक्रिया रोक्न उसले दिएको दवाव र नागरिक समाजको आग्रह अनुसार सभाध्यक्ष नेम्वाङले माघ २९ देखि अनिश्चितकालका लागि स्थगित बैठक स्थगित गरेका थिए । सहमति प्रयास असफल भएपछि बहुमतिय प्रक्रिया पुनः अघि बढाउन डाकिएको संविधानसभाको बैठक शोक प्रस्तावमा सिमित भएको हो ।