२०४६ सालको परिवर्तनको २५ वर्ष पूरा

काठमाडौं । आज चैत्र २६ गते अर्थात २५ वर्ष अगाडि जनताको आन्दोलनको बलमा ३० वर्षे पंचायती निरंकुश शासनले घुँडा टेकेको दिन । नेपाली कांग्रेसले नेतृत्त्व गरेको यो आन्दोलनमा विभिन्न कम्युनिस्ट पार्टीहरूको समूह संयुक्त वाम मोर्चा बनाएर आन्दोलनमा उत्रिएका थिए । ५० दिनसम्म चलेको यो आन्दोलनमा तत्कालीन पञ्चायती शासकहरूले बर्बरतापूर्वक दमन गपनि केही नलागेपछि राजाले जनतासामु घुँडा टेके र चैत्र २६ गते राती निर्दलीयता शब्द हटाएको घोषणा गर्दै पंचायती व्यवस्थाको अन्त्य भएको घोषणा गरेका थिए । २०४६ सालको आन्दोलन फागुन ७ गते काठमाडौंमा आन्दोलन सुरू भएको थियो । संयुक्त बाम मोर्चा र नेपाली कांग्रेसले संयुक्त रूपमा पंचायतका बिरुद्धमा आन्दोलन गरेको पहिलो पटक थियो । चैत्र २६ गते राती आन्दोलनकारीका तर्फबाट ४ जनाले राजासँग भेटेपछि संवैधानिक राजतन्त्र, बहुदलीय व्यवस्था र मौलिक अधिकारको प्रत्याभूति दिलाउने शर्तमा आन्दोलन स्थगित भएर बहुदलिय व्यवस्था घोषणा भएको हो । राजाले नयाँ सरकारको नेतृत्त्व गर्न नेपाली कांग्रेसका नेता तथा जनआन्दोलनका कमाण्डर गणेशमान सिंहलाई आग्रह गरेतापनि उनले त्यो पद अस्वीकार गरेपछि ाजाले बैशाख ३ गते नेपाली कांग्रेसका कार्यवाहक सभापति कृष्णप्रसाद भट्टराईलाई प्रधानमन्त्रीमा नियुक्त गरेर तत्कालिन प्रधान न्यायाधीश विश्वनाथ उपाध्यायको अध्यक्षतामा संविधान सुझाव आयोग गठन गर्दै नयाँ संविधान २०४७ निर्माण भएको थियो । जुन संविधानमा मौलिक हक, बालिग मताधिकार, संसदीय प्रजातन्त्र र संवैधानिक राजतन्त्र, स्वतन्त्र न्यायपालिका आदिको ग्यारेन्टी गरिएको थियो । यसले नेपालमा २ सदनात्मक संसद प्रतिनिधि सभा र राष्ट्रिय सभाको व्यवस्था गरेको थियो । नयाँ संविधान अनुसार २०४८ बैशाख २९ गते संसदको निर्वाचन भइ बुहदलिय व्यवस्थाको संस्थागत बिकास अगाडि बढेको थियो ।