ढकालको शोकमा समिति बैठक स्थागित,शोक प्रस्ताव पास गर्दै संविधानसभा केहि दिन रोकिने

काठमाडौं । एमाले नेता रामनाथ ढकालेको शोकमा व्यवास्थापिका संसदका दुईवटा समितिका बैठक रोकिएका छन् । बिहान ८ बजेलाई बोलाइएको कृषि तथा जलस्रोत समिति र साढे ८ मा बोलाइएको सामाजिक न्याय तथा मानवअधिकार समितिको बैठक पनि स्थगित भएको छ । राज्य व्यवस्था समितिका पूर्वसभापति ढकालको आइतबार निधन भएपछि सूचना टाँसेर बैठक स्थगित भएको समिति सचिवालयहरुले जनाएका छन् । यस्तै आज बोलाइएको संविधानसभा बैठक शोक प्रस्ताव पारित गर्दै केही दिनका लागि स्थगित गरिने भएको छ । बैठकले रामनाथ ढकालको निधनमा शोक प्रस्ताव पारित गर्ने भएको हो । ढकालको सोमबार बिहान ११ बजे अन्तिम दाहसंस्कार हुने भएकाले दिउँसो बस्ने संविधानसभा बैठक शोक प्रस्ताव पारित गरेर स्थगित गरिने संविधानसभा सचिवालय स्रोतले जनाएको छ । ‘आर्यघाटमा दाहसंस्कार प्रक्रिया सुरु भएपछि संविधानसभाले श्रद्धान्जली दिने कार्यक्रम तय गरेको छ,’ सचिवालय स्रोतले भन्यो । ३० दलीय मोर्चाको आमहडतालसहित आन्दोलनका कार्यक्रम रहेकाले सहमतिका लागि थप समय उपलब्ध गराउने तयारी भइरहेको स्रोतले जनायो । संविधानसभा बैठक १ महिना २३ दिनको स्थगनपछि सोमबार दिउँसो १ बजेका लागि बोलाइएको छ । प्रस्ताव निर्माण समितिले तयार पारेको प्रश्नावली अनुमोदन गर्दै संविधानसभा बैठक माघ २९ मा अर्को सूचना नभएसम्मका लागि स्थगित गरिएको थियो । संविधानका अन्तर्वस्तु राज्य पुनःसंरचना, शासकीय स्वरूप, निर्वाचन प्रणाली र न्याय प्रणालीको प्रतिवेदनमा दलहरूबीच अहिले पनि विवाद कायमै छ ।