रामनाथ ढकाल निधनमा शोक प्रस्ताव पास गर्दै सोमबारको संविधानसभा स्थागित हुने

काठमाडौं । लामो समयपछि सोमबार बस्न लागेको संविधानसभाको बैठक नियमित कार्यसूचिमा प्रवेश नगरी स्थगित हुने भएको छ । एमाले पोलिटब्यूरो सदस्य एवम् पूर्व सभासद रामनाथ ढकालको आइतबार उपचारको क्रममा निधन भएपछि भोलि बस्ने संविधानसभाको बैठकमा उनको निधनमा सभाले शोक प्रस्ताव पारित गर्दै स्थगित हुने संविधानसभा सचिवालयले बताएको छ । सभाध्यक्ष सुवासचन्द्र नेम्वाङले विगतको प्रचलन अनुसार भोलिको बैठक कार्यसूचिमा प्रवेश नगरी पूर्वसभासद ढकालको निधनमा शोक प्रस्ताव पारित गरी स्थगित हुने जानकारी दिए । संविधानका विवादित विषयमा दलहरुबीच चर्को मतभेद कायम रहँदा माघ २९ गतेदेखि अनिश्चितकालका लागि स्थगित संविधानसभाको बैठक सभाध्यक्षले सोमबारका लागि डाकेका थिए । संविधानका मुख्य विवादित विषयमा सहमति बिना संविधान निर्माण कार्य अघि बढ्न नसक्ने अडान लिदै आएको एमाओवादी र मधेसवादी दल लगायतको १९ दलले सहमति विना बैठक डाकेको भन्दै यसअघि भोलिको बैठक बहिष्कार गर्ने बताएका थिए । विषयमा प्रवेश नगरी पूर्वसभासद ढकालको निधनमा शोक प्रस्ताव पारित गर्ने बैठकमा एमाओवादी गठबन्धन उपस्थित हुने वा नहुने अहिलेसम्म कुनै टुंगोमा पुगेको छैन ।