न्यूनतम साझा बिन्दु खोजेर छिटो संविधान देऊ : राष्ट्रपति

वीरगन्ज । राष्ट्रपति डा रामवरण यादवले राजनीतिक दलबीचको सहमतिमा देशमा चाँडै संविधान जारी होस् भन्ने कामना गरेका छन् । भगवान् महावीरको दुई हजार ६१४औँ जन्मजयन्ती समारोहलाई सम्बोधन गर्दै उनले भने–‘दलीय सहमतिमा मुलुकमा शीघ्र संविधान बनेर राष्ट्र शान्ति, प्रगति र समृद्धिको मार्गमा अग्रसर होस् भन्ने नेपाली जनताका तर्फबाट कामना गर्न चाहन्छु ।’ राष्ट्रपतिले नेपाली जनताको चाहना मुलुकमा शान्ति, स्थायित्व र विकास भएकाले परिवर्तनका संवाहकका ?पमा रहेका राजनीतिक दलले यसलाई उच्च सम्मान गरी अघि बढ्नुपर्नेमा जोड दिए । ‘अहिले अलमल गर्ने बेला होइन, नेपालीको त्यो चाहनालाई पूरा गर्नका लागि राजनीतिक दलहरुले न्यूनतम साझा बिन्दु खोजेर एकता र सहमतिका आधारमा मुलुकमा छिटोभन्दा छिटो संविधान बनाऊ’ उनले भने, ‘हामी कोही मधेसी छैनौँ, पहाडी र हिमाली पनि छैनाँै, पहिला हामी सबै नेपाली हौँ, यो सन्देशलाई हामी सबैले बुझ्नुपर्छ ।’ उनले जाति, क्षेत्र र पार्टीभन्दा माथि उठेर राष्ट्र र नेपाली जनताको विकास र समृद्धिको बाटामा लाग्न सबैमा आग्रह गरे । राष्ट्रपतिले आर्थिक प्रगति र उन्नतिको बाटामा अग्रसर भएका हाम्रा दुई छिमेकी भारत र चीनको बीचमा रहेको अति सुन्दर मुलुक नेपालले पनि आफ्नो विकास र समृद्धिका लागि शान्ति, स्थिरता र सामाजिक सद्भावको बाटामा लाग्नुपर्नेमा जोड दिए । राष्ट्रपति डा यादवले हिंसा, पशुबलि, जातिपाती भेदभावको बोलवाला रहेको बेला जैनधर्मका प्रवद्र्धक महावीरले सत्य, अहिंसाजस्ता मूलभूत उपदेशका माध्यमबाट दुनियाँलाई सही बाटो देखाउने प्रयास गर्नुभएको उल्लेख गर्दै दर्शन, कला, र साहित्यका धनी जैन संस्कृतिले निष्ठापूर्वक समाज सञ्चालन गर्न मानव मात्रलाई एक महत्वपूर्ण जीवनशैली प्रदान गरेको हामी सबैले अनुभूत गरेका बताए । सो अवसरमा आचार्य महाश्रमणले कुनै पनि राष्ट्र र समाजको उन्नति तथा प्रगतिका लागि शान्ति, सद्भाव, अहिंसा र नैतिकता अपरिहार्य भएको हुँदा यस मार्गमा लाग्न सबैमा आग्रह गर्नुभयो । कार्यक्रममा जैन श्वेताम्बर तेरापन्थी सभा वीरगन्जका अध्यक्ष अशोक वैद्यले पनि सम्बोधन गरेका थिए । सद्भावनाको संप्रसार, नैतिकताको प्रचारप्रसार र नशामुक्ति अभियानको मूल उद्देश्य लिएर गत कात्तिक २३ मा भारतको राजधानी नयाँ दिल्लीबाट सुरु भएको सो अहिंसा पदयात्रा भारतका हरियाणा, उत्तर प्रदेश, मध्यप्रदेश र विहारका विभिन्न सहर हुँदै यही चैत १७ गते नेपालको वीरगन्ज प्रवेश गरेको थियो । यो पदयात्रा वीरगन्जबाट हेटौँडा, दामन, पालुङ, नौबिसे र थानकोटको बाटो हुँदै आगामी वैशाख ७ गते काठमाडौँ पुग्ने कार्यक्रम रहेको बताइएको छ । करिब एक महिना काठमाडौँको विश्रामपछि सो यात्रा विराटनगर हुँदै भारत र भुटानमा समेत जाने बताइएको छ । नेपाल, भारत र भुटानमा दश हजार किमीभन्दा बढीको पदयात्रा हुने जैन श्वेताम्बर तेरापन्थीसभा वीरगन्जका अध्यक्ष अशोक वैधले जानकारी दिए ।