अध्यक्ष ओली र नेता भट्टराईबीच भेटवार्ता

भक्तपुर, १२ चैत । नेकपा एमालेका अध्यक्ष केपी शर्मा ओली र एमाओवादीका वरिष्ठ नेता डा बाबुराम भट्टराईबीच बोलकोटस्थित ओली निवासमा भेटवार्ता भएको छ । ओली निवासमा बुधबार राति पुगेका नेता भट्टराई र अध्यक्ष ओलीबीच एमालेको स्थायी समिति बैठक सम्पन्न भएपछि राति अबेर भेटवार्ता भएको हो । करिब एकघण्टा भएको भेटवार्तामा दुई नेताबीच वर्तमान राजनीतिक गतिरोध अन्त्य गर्नेबारेमा छलफल भएको ओली निवास स्रोतले जानकारी दिएको छ । राजनीतिक गतिरोध अन्त्य गर्ने, विवादित विषयलाई मिलाउन वैकल्पिक मार्गको खोजी गर्ने र सहमतिबाटै अगाडि बढ्ने बारेमा दुई नेताबीच कुराकानी भएको बताइएको छ ।