महानगरपालिका र कर्मचारीबीचको सहमतिपछि राजधानीको फोहोर उठाउन सुरु

काठमाडौं । काठमाडौं महानगरपालिका र कर्मचारीबीचको सहमतिपछि विगत केहीदेखि अवरुद्ध भएको काठमाडौँ उपत्यकाको फोहोर संकलन कार्य आज बिहानदेखि पुनः सञ्चालन भएको छ । उपप्रधानमन्त्री एवम् संघीय मामिला तथा स्थानीय विकास मन्त्री प्रकाशमान सिंहले तत्काल समस्याको समाधान गर्न मन्त्रालयका अधिकारी र महानगरपालिका तथा उपमहानगरपालिकाका पदाधिकारीलाई आइतबार निर्देशन दिएपछि आजबाट पुनः सञ्चालन काठमाडौं महानगरपालिकाका कार्यकारी प्रमुख पूर्णभत्तल तण्डुकारले जानकारी दिए । गत शुक्रबार काठमाडौंबाट फोहोर बोकेर नुवाकोटको सिसडोलतिर जाँदै गरेको निजी व्यवसायीको गाडीको ठक्करबाट स्थानीय एक बालकको निधन भएपछि स्थानीयवासीले गाडी जलाएपछि अवरोध उत्पन्न भएको थियो । महानगरका कर्मचारीका सुरक्षाको प्रत्याभूतिको मागलाई सम्बोधन गर्न नेतृत्व तयार भएको तथा फोहर ओसार्न थप केही ठूला उपकरण ल्याउन सकारात्मक देखिएपछि कर्मचारी सङ्गठन फोहर उठाउन राजी भएका हुन् । काठमाडौँमा दैनिक ५५० र ललितपुरमा २५० टन फोहर जम्मा हुने गरेका छन् ।