वैदेशिक रोजगारमा भएका १० लाख नेपालीको एमआरपी अझै बनेन

काठमाडौं । हस्तलिखित पासपोर्ट प्रयोग गर्न नपाइने ‘डेडलाइन’ साढे आठ महिना बाँकी रहेकै अवस्थामा वैदेशिक रोजगारीमा रहेका झन्डै १० लाख नेपालीले ‘मेसिन रिडेबल पासपोर्ट’ (एमआरपी) बनाएका छैनन् । नेपाली कामदार संख्या बढिरहेका चार मुलुकमा टोली पठाएरै हस्तलिखित पासपोर्ट रिप्लेसका लागि राहदानी विभागले परराष्ट्र मन्त्रालयलाई आग्रह गरिसकेको छ । विदेशस्थित दूतावासले पनि टोली नपठाए समयमै काम नसकिने जानकारी गराइरहेको छ । हाल, कतारमा मात्रै त्यहीबाट एमआरपी बनाउने सेवा दिइरहेको अवस्था छ । मलेसिया, साउदी अबर र संयुक्त अरब इमिरेट्स (यूएई) मा भने विभिन्न कारण सेवा सुरु हुन सकेको छैन् । अन्तर्राष्ट्रिय नागरिक उड्डयन संगठन (आइकाओ) को नियमअनुसार २४ नोभेम्बर २०१५ पछि हस्तलिखित राहदानीले विदेश यात्रा गर्न पाइदैन । गत शुक्रबार सम्ममा ३१ लाख ६ हजार चार सय ३४ एमआरपी बनिसकेको राहदानी विभागले जनाएको छ । यो विभिन्न जिल्लामा जारी एमआरपीको कुल संख्या हो ।