सत्तापक्ष वार्तामा गम्भिर नभएको भन्दै एमाओवादी मोर्चाले बैठक बोलायो

काठमाडौं । सत्तारुढ दल वार्तामा गम्भीर नदेखिएको निष्कर्ष निकालेको एमाओवादी नेतृत्वको ३० दलीय मोर्चाको आज बैठक बस्दैछ । दिउसो मोर्चाको बैठक बस्न अघि एमाओवादी अध्यक्ष एंव मोर्चाका संयोजक दाहालले अहिले बिहान मधेसी, जनजातिसहित सचिवालयको बैठक बोलाएका छन् । अपराहन विपक्षीको ३० दलको बैठक बस्ने तय भएको मोर्चाका प्रवक्ता प्रेमबहादुर सिंहले जानकारी दिए । सहमतिका लागि मोर्चाले सरकारलाई फागुन २६ को अल्टिमेटम दिएको थियो । तर, यो अवधिमा एमाले नेताहरुले वार्ताप्रति कुनै रुची नदेखाएको एमाओवादी निश्कर्ष छ । केहि दिन अघि डेढ महिनापछि भएको दलहरुको वार्तामा एमालेका जिम्मेवार नेताहरु सहभागि नभएको र सत्तापक्षले समय कटाउने बाटो मात्र बनाएको आरोप मोर्चाले लगाउदै आएको छ । सत्तापक्षले वार्तामा नबोलाएपछि के गर्ने भन्नेबारे सोमबार साँझ प्रचण्ड निवास लाजिम्पाटमा एमाओवादीका शीर्ष नेताले आन्तरिक छलफल गरेपछि मंगलबार मोर्चाको बैठक बस्ने तिथि तय भएको हो । त्यही लगतै प्रधानमन्त्री सुशील कोइरालाले वार्ताको वातावरण बनाउन सवैलाई आग्रह गर्दै बिज्ञप्ती निकालेका थिए । मोर्चाका एक नेताका अनुसार बिहान बस्ने सचिवालयको बैठकले आन्दोलनको खाका समेत बनाउने र दिउँसो ३ बजे मोर्चाको शीर्ष नेताहरुको बैठकमा पेश गरिनेछ । मंगलबार सत्तापक्षसँग वार्ता नभए विपक्षीले आन्दोलन घोषणा गर्ने तयारी गरेको बताइएको छ । तर मोर्चाले दोस्रो चरणको आन्दोलन घोषणा गरे पनि वार्ताको ढोका भने खुला राखिने जनाएको छ । मोर्चाले मधेशी जनअधिकार फोरम नेपालका अध्यक्ष उपेन्द्र यादवको असहमतिका वावजुद बिनासर्त वार्ता गर्ने निर्णय गरेको थियो ।