वार्तामा बस्न विपक्षी मोर्चा तयार

काठमाडौं । एकीकृत नेकपा माओवादी नेतृत्वको विपक्षी मोर्चा संविधान लेखनबारे सत्तारूढ राजनीतिक दलसँग औपचारिक वार्तामा बस्न तयार भएको छ। एमाओवादी संसदीय दल कार्यालयमा बिहीबार बिहान बसेको विपक्षी मोर्चाको बैठकले वार्ता र संवादमार्फत संविधान निर्माणमा सहमति खोज्ने निर्णय लिएको हो। यसअघि मोर्चा संयोजक दाहालले बुधबार प्रधानमन्त्री सुशील कोइराला र एमाले नेता माधवकुमार नेपाललाई भेटेर औपचारिक वार्ता थाल्ने विषयमा छलफल गरेका थिए। ‘‘पूर्ण सहमतिको वातावरण तत्काल नबने पनि सहमतीय संविधान निर्माणका लागि दृढ हुँदै मुलुकलाई मुठभेड र द्वन्द्वबाट जोगाउन वार्तामा बस्ने निर्णय गरेका हौं,’ मोर्चाका प्रवक्ता प्रेमबहादुर सिंहले बिहीबार संचारकर्मीसंग भने, ‘औपचारिक निर्णय नै भइसकेकाले संविधान निर्माणका विषयमा चाँडै वार्ता र संवादको प्रक्रिया सुरु हुनेछ।’ अवरोध र विरोधका बाबजुद सभाध्यक्ष सुवासचन्द्र नेम्वाङले माघ ११ गते प्रस्ताव निर्माण समिति गठन गरेपछि असन्तुष्ट विपक्षी मोर्चाले संविधानसभाका सम्पूर्ण प्रक्रिया बहिष्कार गर्दै आएको छ। मोर्चामा आबद्ध एमाओवादी र मधेसीसहित दलहरूले सहमतिमै संविधान बन्नुपर्नेमा जोड दिँदै आन्दोलन गरिरहेका छन्। फागुन १६ गते राजधानीमा शक्ति प्रदर्शन गरेको मोर्चाले दोस्रो चरणको कार्यक्रम भने निर्धारण गरेको छैन।