दुर्घटनाग्रस्त विमान निकाल्न नसक्दा त्रिभुवान बिमानस्थल अनिश्चितकालका लागि बन्द

काठमाडौं (जस)– टर्कीको इस्तानबुलबाट काठमाडौं आएका टर्किस एयरलाइन्सको जहाज त्रिभुुवन बिमानस्थलमा ठुलो दुर्घटनाबाट बचेको छ । बुधबार बिहान पौने ८ बजे विमानस्थलमा अवतरण गर्दै गर्दा टीके ७२६ फ्लाइटको विमान रन वेबाट चिप्लिएको हो । टर्किस एयरलाइन्सको जहाज काठमाडौंमा दुर्घटना भएको पहिलो पटक हो । काठमाडौंको मौसम बुधबार पनि खुलेको छैन । सेतो कुहिरोले भिजिबिलिटी कम भएको विमानस्थल स्रोतले जनाएको छ । मौसममा खरावी हुँदा काठमाडौंबाट हुने उडान केही दिनयता प्रभावित हुँदै आएका छन् । जहाजमा २ सय ४८ जना यात्रु थिए । उनीहरुलाई आपतकालीन ढोकाबाट निकालिएको थियो । जहाजमा सामान्य क्षति भएको छ । टर्किस एयर काठमाडौं आउने सबैभन्दा लामो दूरीको जहाज हो । जसको उडान अवधि ७ घण्टाको रहेको छ । सेप्टेम्बर १ देखि नेपालमा उडान अनुमति भएको थियो । टर्किस एयर गन्तव्यका हिसावले विश्वको चौथो ठूलो विमान कम्पनी हो । नेपाल–टर्कीबीच सन् २०१० मा हवाई सम्झौता भएको थियो । दुर्घट्नाग्रस्त विमान दुर्घट्नास्थलबाट बुधबार साँझसम्म हटाउन सकिएको छैन । उक्त विमान हटाउन नसक्दा अन्तराष्ट्रिय उडानहरु रद्द भएका छन् । उडान रद्द हुँदा ठूलो संख्यामा यात्रुहरु विचल्लीमा परेका छन् । भारतबाट क्रेन ल्याएर विहिवार मात्र दुर्घट्नाग्रस्त विमान हटाइने विमानस्थलले जनाएको छ । त्रिभुवन अन्तर्राष्ट्रिय विमानस्थलले बिहीबार अपरान्ह ४ बजेसम्मका लागि सबै अन्तराष्ट्रिय उडानमा रोक लगाएको छ । टर्किस एयरलाईन्सको विमान अवतरणको क्रममा बुधबार बिहान विमानस्थलमा रन वे नजिकै दुर्घट्ना भएपछि अन्तराष्ट्रिय विमानको उडान र अवतरणमा रोक लगाइएको छ । यसअघि बुधवार ५ बजेसम्मका लागि उडान रोकिएपनि त्यसको समय अवधि बढाईएको छ । दुर्घट्ना र त्यसले पारेको प्रभावबारे जानकारी दिन त्रिभुवन अन्तराष्ट्रिय विमानस्थलले अहिले साँझ ७ बजे पत्रकार सम्मेलन गर्दैछ । विमानस्थलका प्रबन्धक पूर्ण चुँडालले भने–‘भोलि अपरान्ह ४ बजेसम्मका लागि अन्तराष्ट्रिय उडान रोकिएको छ । सबै कुरा पत्रकार सम्मेलनमा जानकारी गराउँनेछौं ।’ उनका अनुसार विमानस्थलको धावन मार्गको क्षेत्रमा अवरोध आएकाले सुरक्षा दृष्टिकोणले अन्तराष्ट्रिय उडान रद्द गर्नु परेको हो । यसैबीच सरकारले विमान दुर्घटनाबारे छानविन गर्न सरकारले पूर्व सचिव नरेन्द्रप्रसाद घिमिरेको अध्यक्षतामा चार सदस्यीय छानविन समिति गठन गरेको छ । समितिमा वरिष्ठ पाइलट विएम अमात्य, नेपाल वायुसेवा निगमका इन्जिनियर चुणामणी वस्याल र संस्कृति पर्यटन तथा नागरिक उड्यान मन्त्रालयका सहसचिव वुद्दिसागर लामिछाने रहेका छन् । दुर्घटनामा परेको टर्किस एयरलाइन्सको जहाजलाई दुर्घट्नास्थलबाट निकाल्न टर्कीबाटै प्राविधिक टोली आइपुग्दैछ । टोली बुधबार बेलुकीसम्म नेपाल आइपुग्ने जनाइएको छ । त्रिभुवन अन्तराष्ट्रिय विमानस्थलमा ठूलो जहाज निकाल्ने प्रविधि र प्राविधिक छैनन् । दुर्घट्नाग्रस्त जहाजलाई रातो झन्डाले घेरा हालेर सेना र प्रहरीले सुरक्षा दिइरहेको छ । उक्त दुर्घट्नापछि कुनै पनि अन्तराष्ट्रिय उडान हुन सकेनन । यात्रुहरु सबै सकुशल रहेको र एकजना यात्रु सामान्य घाइते भएको टर्किस एयरलाइन्सद्वारा जारी विज्ञप्तीमा जनाइएको छ । यात्रुहरुलाई उद्धार गरिएपनि विमानबाट लगेज निकाल्न सकिएको छैन । बिमानका यात्रु व्यावसायी दिपक मलहोत्राले आफु मृत्युको मुखबाट बचेको बताए । उनले जहाजको अवतरण स्वाभाविक नभएको बताए । उनले आफु जहाजको बिजनेस क्लासमा भएकाले सबैभन्दा पहिले बाहिर आउने अवसर पाएको बताए । उनले बाहिर निस्किएपछि मात्र जबर्जस्ती अवतरण गराउँदा जहाज विमानस्थलको रन वेभन्दा बाहिर गएको जानकारी पाएको बताए ।