टर्किस एयरलाइन्सको विमान दुर्घटनाबाट जोगियो

काठमाडौं । टर्किस एयरलाइन्सको जहाज दुर्घटनाबाट जोगिएको छ । विमान टर्कीको इस्तानबुलबाट काठमाडौं आएको थियो । बुधबार बिहान पौने ८ बजे काठमाडौंस्थित त्रिभूवन विमानस्थलमा अवतरण गर्ने क्रममा रनवेबाट चिप्लिएको हो । टर्किस एयरलाइन्सको टीके ७२६ फ्लाइटको विमान काठमाडौंमा दुर्घटना भएको पहिलो पटक हो । काठमाडौंको मौसम बुधबार पनि खुलेको छैन । सेतो कुहिरोले भिजिबिलिटी कम भएकाले विमान दुर्घटना भएको हुन सक्ने विमानस्थल स्रोतले जनाएको छ । मौसममा खरावी हुँदा काठमाडौंबाट हुने उडान केही दिनयता प्रभावित हुँदै आएका छन् । जहाजमा २ सय ४८ जना यात्रु थिए । उनीहरुलाई आपतकालीन ढोकाबाट निकालिएको थियो । जहाज अहिले पनि चौरमा छ । जहाजमा सामान्य क्षति भएको छ । टर्किस एयर काठमाडौं आउने सबैभन्दा लामो दूरीको जहाज हो । जसको उडान अवधि ७ घण्टाको रहेको छ । सेप्टेम्बर १ देखि नेपालमा उडान अनुमति भएको थियो । टर्किस एयर गन्तव्यका हिसावले विश्वको चौथो ठूलो विमान कम्पनी हो ।