प्रधानमन्त्री कोइराला र एमाओवादी अध्यक्ष दाहालले एउटै मञ्चबाट जनाए सहमतिको संविधान दिने प्रतिबद्धता

चितवन । प्रधानमन्त्री सुशील कोइराला र विपक्षी गठबन्धन ३० दलीय मोर्चाको नेतृत्व गरिरहेका एमाओवादीका अध्यक्ष पुष्पकमल दाहालले मंगलवार एउटै सभामा उभिएर छिट्टै सहमतिबाट संविधान जारी हुने प्रतिवद्धता जनाएका छन् । मञ्चमा नै वार्ता गरि सहमतिको सन्देश दिन सहमतिका साथ कोइराला र दाहालले संविधान जारी गर्ने प्रतिवद्धता जनाएका हुन् मञ्चमा नै कोइराला र दाहालले आधा घण्टा छलफल गरेका थिए । पश्चिम चितवनको शिवनगरस्थित नारायणी विद्या मन्दिर उच्च माविको स्वर्ण महोत्सवको संयुक्त रुपमा उदघाटन गरेपछि कोइराला र दाहालले सहमतिको सन्देश दिएका हुन् । संविधानसभामा प्रक्रिया अगाडि बढाएपछि एउटै नदेखिएका कोइराला र दाहाल संविधानसभामा आफ्नो निर्वाचन क्षेत्रमा रहेको बिद्यालय र दाहाल अध्ययन गरेको बिद्यालयको स्वर्ण महोत्सवको उदघाटन गर्न पुगेको थिए । उनीहरुले आफ्नो सम्बोधनका क्रममा काठमाडाँै फर्किएपछि वार्ता र संवादबाटै सहमति खोजेर संविधान बनाउने विश्वास पनि दिलाए । प्रधानमन्त्री कोइरालाले अध्यक्ष दाहाल र अध्यक्ष दाहालले कोइरालालाई सहमतिको वातावरण निर्माण गर्न एकअर्कासँग आग्रह गरेका थिए । कार्यक्रममा प्रधानमन्त्री कोइरालाले जनताको चाहनाअनुरुपको संविधान जारी गर्न आन्दोलनरत दलहरुसँग छिट्टै सहमति हुने बताए । प्रधानमन्त्री कोइरालाले अध्यक्ष दाहालप्रति संकेत गर्दै उहाँले सहमतिका लागि धेरै दिन नलाग्ने पनि बताएको सम्बोधनमा बताए । प्रधानमन्त्री कोइरालाले भने, ‘अब मुलुकलाई विकास चाहिएको छ, त्यसका लागि शान्ति र संविधान जरुरी छ ।’ पैतीस लाखभन्दा बढी युवा विदेशमा रहेको भन्दै उनले देशमा संविधान बनेसँगै शान्ति र विदेशी लगानी भित्रिने वातावरण बन्ने आशा व्यक्त गरे । कृषि, पर्यटन, सडकलगायतमा विदेशी लगानी बढे स्वदेशमै युवाले रोजगारी पाउने र देशको विकास हुने उनको भनाइ थियो । सबै जाति, धर्म, समुदाय र भाषा समेटिने गरी संविधान बन्ने आश्वासन दिँदै उप्रधानमन्त्रीले भने, ‘तपाईंहरु सबै ढुक्क हुनुहोस् । संविधान बनेसँगै सबैको माग पूरा हुन्छ ।’ प्रधानमन्त्री कोइरालाले मञ्चमै रहनुभएका अध्यक्ष दाहालसँग अनुमति मागेर आफूसँगै तीनपटक जय नेपाल भन्न अनुरोध गरे । कार्यक्रममा एमाओवादी अध्यक्ष दाहालले केही दिनभित्रै दलहरुबीच संविधान निर्माणको विषयमा सहमति हुने कुरामा आफू विश्वस्त रहेको बताए । प्रधानमन्त्री कोइरालासँग मञ्चमा अनौपचारिक छलफल भएको उल्लेख गर्दै उनले प्रधानमन्त्री पनि सकारात्मक देखिएकाले छिट्टै सहमति हुनेमा विश्वस्त रहेको बताए । राजनीतिक परिस्थिति जटिल रहेको भन्दै अध्यक्ष दाहालले गाँठो फुकाउन सहमतिबाट संविधान निर्माण गर्नुपर्नेमा जोड दिए । अध्यक्ष दाहालले काठमाडाँै फर्किएलगत्तै सत्ता पक्ष र विपक्षीहरुको बीचमा वार्ताको वातावरण बनाउन यस कार्यक्रमको महत्वपूर्ण भूमिका हुने बताए । गणतान्त्रिक नेपालको पहिलो प्रधानमन्त्री आफूलाई बनाउन यस विद्यालयको भूमिका रहेको भन्दै अध्यक्ष दाहालले विद्यालयको विकासका लागि आफ्नोतर्फबाट सहयोग पुर्याउने वचन दिए ।