कांग्रेसले वार्ताका लागि विपक्षी मोर्चालाई दबाब दिने

काठमाडौ । नेपाली कांग्रेसले संविधानभालाई अगाडि बढाउनका विपक्षी मोर्चालाई दबाब दिने रणनीति अगाडि सार्ने भएको छ । पदाधिकारी बैठकले संविधानसभा रोकिएको २० दिन भइसक्दा पनि एमाओवादी सहमतिमा पनि आउँदैन, प्रक्रिया पनि अघि बढ्न नदिएको भन्दै विपक्षी मोर्चालाई दबाब दिने निष्कर्ष निकालेको हो । प्रधानमन्त्री सुशील कोइराला एमाओवादी अध्यक्ष पुष्पकमल दाहालसंगैको कार्यक्रममा सहभागि हुनका लागि चितवन जानुअघि भएको बैठक एमाओवादीलाई नेपाली कांग्रेसले दबाब दिने निष्कर्ष मा पुगेको हो । बैठकमा एमावादीलाई सहमतिका लागि तयार हो कि होइन् भन्ने स्पष्ट रुपमा सोध्ने तयारीमा कांग्रेस लागेको हो । बैठकमा एमाओवादी नेतृत्वको मोर्चालाई सहमतिमा आउनका लागि अब बढिमा साता दिनको समय दिने समेत निष्कर्ष निकालिएको सहमहामन्त्री पुर्णबहादुर खड्काले जानकारी दिए । बैठकले अब प्रधानमन्त्रीले फेरि विपक्षी मोर्चालाई वार्ताका लागि लिखित आग्रह नगर्ने निर्णय समेत गरेको छ । प्रधानमन्त्रीले दुई–दुईपटक वार्ताका लागि औपचारिक आह्वान गर्दा पनि वार्तामा नआएको भन्दै कांग्रेसले कडा ढंगले अगाडि बढ्ने संकेत दिएको छ । बैठकमा कांग्रेस नेताहरुले एमाओवादी नेता डा. बाबुराम भट्टराईले बिदेशी भुमीमा पुगेर जथाभावि बोलेको भन्दै आलोचना भएको थियो । भारत भ्रमणमा रहेका भट्टराईले नेपालका प्रधानमन्त्री र एमाले अध्यक्ष केपी ओलीलाई गाली गरेको भन्दै पूर्वप्रधानमन्त्रीले अर्काको देशमा त्यसरी बोल्न नमिल्ने कांग्रेस नेता डा शेखर कोइरालाले बालुवाटारमा कुरा उठाएका थिए । यस्तै कांग्रेसले सरकार छाड्ने धम्कीबारे सत्ता साझेदार एमालेसँग सोध्ने भएको छ । अनौपचारिक कुराकानीमा एमाले नेताहरुले स्थायी समितिले यो बिषयमा निर्णय नभएको बताएपछि सो बिषयमा एमालेको धारणा माग गर्ने निर्णय भएको बताइएको छ । कांग्रेस एमालेको बैठकमा सत्तासाझेदार एमालेसंग सरकार छोड्ने विषयमा धारणा माग गर्ने भएको हो । एमालेको स्यायी कमिटीको सोमबारको बैठकमा कांग्रेससँगको सत्ता साझेदारीबारे प्रश्न उठेको थियो । संविधान निर्माणका लागि कांग्रेससँग सत्ता साझेदारी गरेको भन्दै एमाले नेताहरुले संविधान निर्माण प्रक्रिया अघि नबढ्ने हो भने सत्तामा किन बसिरहने भन्दै प्रश्न गरेका थिए ।