विजुली नहुँदा जाजरकोट अस्पतालमा एक्स–रे मेसिन चलाउन समस्या

जाजरकोट । आवश्यक विद्युत् आपूर्ति नहुँदा जिल्ला अस्पताल जाजरकोटमा एक्स–रे मेसिन सञ्चालन गर्न समस्या हुँदै आएको छ । जिल्ला अस्पतालमा प्रयोग हुँदै आएको पुरानो एक्स–रे मेसिनलाई जेनेरेटर र विद्युतको संयुक्त पावरबाट सञ्चालन गर्दै आएकोमा नयाँ एक्स–रे मेसिन भित्रिएपछि थप सञ्चालनका लागि पावरको समस्या परेको हो । नयाँ एक्स–रे मेसिन चलाउन ३२ किलोवाट विद्युत् आवश्यक पर्ने भएकाले सो क्षमता भएको नयाँ जेनेरेटर नहुँुदा यो समस्या आएको कर्मचारी सन्तोष बुढामगरले जानकारी दिए । जिल्लामा विद्युतको पावर नियमित नहुने र अब पानीको मात्रा कम हुदै जाँदा यो समस्या आएको हो । एक्स–रे मेसिन नहुँदा यहाँका स्थानीय रुकुमको चौरजहारीमा गएर एक्स–रे गर्न बाध्य थिए ।