सरकारका लागि सुरक्षा चुनौती एमाओवादी मोर्चा, कमल थापा, खुमबहादुरदेखि सिके राउतबाट

काठमाडौं । सरकारले प्रचण्ड नेतृत्वको ३० दलीय मोर्चाको आन्दोलनदेखि नेत्रबिक्रम चन्द, खुमबहादुर, कमल थापा, जेपी गुप्ता र सिके राउतसम्मलाई सुरक्षा चुनौतीको सूचीमा राखेको छ । गृहमन्त्री वामदेव गौतमले संसदको राज्य व्यवस्था समितिको बैठकमा लिखितरुपमा सुरक्षा चुनौती र समस्या पेश गरेका हुन् । गृहमन्त्रीको प्रतिवेदनको पहिलो नम्बरमै प्रचण्ड नेतृत्वको मोर्चाको आन्दोलन र संविधानसभाबाट संविधान जारी हुनुहुँदैन भन्ने पक्षसँगको सहकार्यलाई सुरक्षा चुनौतीका रुपमा राखिएको छ । त्यस्तै मोहन वैद्य र नेत्रबिक्रम चन्द माओवादीका साथै लिम्बुवानका विभिन्न समूहका गतिविधिलाई पनि सरकारले सुरक्षा चुनौतीमा राखेको छ । कट्टर हिन्दुवादी र राजवादीहरुको क्रियाकलाप भन्दै सरकारले कमल थापा, खुमबहादुर खड्कासहितको समूहको गतिविधिलाई पनि सुरक्षा चुनौतीको सूचीमा राखेको छ । सरकारले जेपी गुप्ता नेतृत्वको तराई मधेस राष्ट्रिय अभियानले तराईका भूमिगत समूहसँग सहकार्यको प्रयास गरेको संकेत देखिएको समेत बताएको छ । साथै विखण्डनकारी नारासहित सिके राउतको गतिविधि तराईमा बढेको भन्दै सरकारले यसलाई सुरक्षा चुनौती अन्तरगत राखेको छ ।