सीमावर्ती क्षेत्रका गाँउ हात्तीपाइलेको उच्च जोखिममा

इलाम । इलामको दक्षिणी सीमावर्ती क्षेत्र हात्तीपाइले रोगको उच्च जोखिममा परेको छ । झापा जिल्लासँग सिमाना जोडिएका यहाँका महमाई, चुलाचुली, दानाबारी, शान्तिपुर, लक्ष्मीपुर, चिसापानी, बाँझो, साकफारा र जिर्मले गाविस हात्तीपाइले रोगको जोखिममा रहेको जिल्ला स्वास्थ्य कार्यालयले जनाएको छ । यी गाविसका ४४ मा यो रोगको लक्षण देखापरेको कार्यालयले जनाएको छ । प्रभावित क्षेत्रमा कार्यालयले सुपानेट झूल, ल्याब सेवालगायत कार्यक्रम सञ्चालन गर्दै आएको जिल्ला स्वास्थ्य कार्यालयका भेक्टर कन्ट्रोल सुपरभाइजर बिमल बरालले जानकारी दिए । छ वर्षसम्म निरन्तर यो रोगविरुद्ध औषधि खुवाइने लक्ष्यका साथ कार्यालयले यो वर्ष पनि दुई लाख ६५ हजारलाई औषधि खुवाउने तयारी गरिरहेको बरालले बताउनुभयो । यो वर्ष फागुन २३, २४ र २५ गते औषधि खुवाइने कार्यालयले जनाएको छ । औषधि खुवाउने कार्यमा एक हजार ८८७ स्वयम्सेवक र ३०० स्वास्थ्यकर्मी परिचालन गरिने जानकारी बरालले दिनुभयो । २ वर्षदेखि ७० वर्ष उमेर समूहका मानिसले खान सकिनेछ । बिरामी, गर्भवती महिला, दम तथा मुटुरोगका बिरामीबाहेक सबैले औषधि सेवन गर्नुपर्ने चिकित्सकले सुझाव दिएका छन् । क्युलेक्स जातको पोथी लामखुट्टेको टोकाइबाट स्वस्थ मानिसमा यो रोग सर्दछ । लामखुट्टे नियन्त्रण, फोहोरपानी जम्मा हुन नदिनु, पानीलाई स्वतन्त्र रुपले बग्न दिनु एवम् घरवरपर भएका खाल्डाखुल्डी पुर्नाले यो रोगबाट बच्न सकिन्छ ।