प्रदर्शनमा ल्याइएका सयौं लठ्ठी बरामद

काठमाडौं । सत्तारुढ दलहरुलाई आफ्नो एजेण्डामा सहमतिमा आउन बाध्य पार्न शनिबार गर्न लागिएको एमाओवादी नेतृत्वको मोर्चाको शक्ति प्रदर्शनका लागि ल्याएको सयौं लठ्ठी बरामद भएको छ । मार्चाले शनिबार दिउँसो काठमाडौं खुलामञ्चमा गर्न लागेको प्रदर्शनका लागि बाहिरी जिल्लाबाट काठमाडौं भित्रिएको बसबाट प्रहरीले नागढुंगामा लठ्ठी बरामद गरेको हो । शनिबार बिहान मात्र झण्डै ५ सय लठ्ठी बरामद गरिएको प्रहरीले जनाएको छ । यता मोर्चाले गर्न लागेको प्रदर्शनलाई ध्यान दिंदै प्रहरीले सुरक्षा सतर्कता बढाएको छ । केही दिनअघि वाईसीएल कार्यकर्ताले काठमाडौंमा लठ्ठी सहित प्रदर्शन गरेपछि प्रहरी अझै सचेत भएको हो । प्रहरीका अनुसार शनिबारको जुलुसमा लठ्ठी र भाटा बोक्नेलाई कार्वाही गर्ने बताएको छ । यसअघि लाठी जुलुस प्रदर्शन भएपछि गृह मन्त्रालयले विज्ञप्ती निकालेर लठ्ठी भाटा सहित प्रदर्शन गर्न नपाइने र गरेमा कानुनी कारबाही हुने भन्दै ध्यानाकर्षण गराइसकेको छ ।