३ दिनदेखि बन्द चितवनका होटल खुले

रत्ननगर । तीन दिनदेखि बन्द चितवनका होटल आजदेखि औपचारिक रुपमा सञ्चालनमा आएका छन् । स्थानीय प्रशासन र होटल व्यवसायीबीच मंगलवार साँझ भएको वार्ता सहमतिमा टुंगिएपछि होटल सञ्चालनमा आएका हुन् । एक हप्ताभित्रमा पुरानो आचारसंहिता परिमार्जन गरी नयाँ आचारसंहिता लागू गर्न सहमति भएको व्यवसायीले बताएका छन् । व्यवसायको सुरक्षाको माग गर्दै चितवनमा होटल व्यवसायीले आइतबार बैठक बसी आफ्नो होटल व्यवसाय अनिश्चितकालका लागि बन्द गरेका थिए । गएको शनिबार प्रहरीले होटलमा बसेका ४९ जोडीलाई पक्राउ गरी व्यवसायीलाई समेत नियन्त्रणमा लिएपछि व्यवसायी आन्दोलित भएका थिए । सुरक्षित रुपमा होटल व्यवसाय सञ्चालन गर्न नपाएको भन्दै होटल व्यवसायी संघ चितवनको आह्वानमा बन्द गराएको थियो । प्रमुख जिल्ला अधिकारीसहितका प्रतिनिधिको सहभागिता रहेको सो वार्तामा सामुदायिक सेवा केन्द्र नारायणगढको संयोजकत्वमा आचारसंहिताका लागि कार्यदल गठन गर्ने सहमति भएको छ । त्यसको सदस्यमा होटल व्यवसायी, प्रशासन कार्यायल, प्रहरी कार्यालय उद्योग वाणिज्य संघलगायत छन् । राति ९ नबज्दै जिल्लाका होटल बन्द गराउने, जथाभावी होटलमा छापा मार्ने, गेष्ट हाउसमा बसेका पाहुना तथा व्यवसायीलाई हिरासतमा लिन कार्य गरिएकाले यसले व्यवसाय र व्यवसायीलाई नकारात्मक असर पारेको अध्यक्ष डासीराम ढकालले बताए । प्रहरीले पक्राउ गरेकामध्ये पाँच जोडी श्रीमान् श्रीमतीसमेत परेपछि प्रहरीको धरपकडप्रति तीव्र आलोचना भएको थियो ।