बसन्तपुरमा दुई किशोरीमाथि एसिड खन्याइयो

काठमाडौं । एसएलसीको तयारीका लागि ट्युसन पढ्न जाँदै गरेका दुई किशोरीमाथि राजधानीको बसन्तपुरमा आज विहान अज्ञात समूहले एसिड खन्याइदिएको छ । बसन्तपुर झोछेस्थित ए प्लस ट्युसन सेन्टरमा बसिरहेको अवस्थामा उनिहरुलाई एसिड खन्याइएको हो । रामेछाप खनियापानी ८ घर भई बसन्तपुर बस्ने १६ वर्षकी संगिता मगर र रौतहटकी १५ वर्षकी सीमा बस्नेतमाथि एसिड प्रहार भएको प्रहरीले जनाएको छ । विहान करिव सवा ६ बजे ट्युसन सेन्टरमा बसिरहेको अवस्थामा मास्क लगाएर आएको समूहले एसिड प्रहार गरेर भागेको प्रहरीको भनाई छ । पीडितहरुले बताए अनुसार मास्क लगाएर आएको ३÷४ जनाको समूहले एसिड छ्यापेर भागेको थियो । प्रहरीका अनुसार एसिडले संगिताको छाती र खुट्टामा गम्भीर चोट लागेको छ । उनको वीर अस्पतालमा उपचार भइरहेको छ । सीमाको भने अनुहारमा नै एसिड परेको छ । उनलाई केएमसी अस्पताल सिनामंगल रिफर गरिएको अस्पतालले जनाएको छ ।