संवैधानिक परिषदको बैठक राजनीतिक छलफल परिणत, परिषदको बैठक १२ गते बस्ने

काठमाडौं । । शुक्रवार बोलाइएको संवैधानिक परिषदको बैठक राजनीतिक छलफलमा केन्द्रीत भएपछि संवैधानिक आयोगमा नियुक्तीका विषयमा छलफल गर्न संवैधानिक परिषदको बैठक आउदो १२ गते बस्ने भएको छ । लामो समय देखि संवाद हुन नसकेको सत्ता पक्ष र विपक्षको वार्ताको थलो संवैधानिक परिषदको बैठक बनेको थियो । सत्तापक्षसँग औपचारिक वार्ता नगर्ने भनिए पनि एमाओवादी अध्यक्ष पुष्पकमल दाहालले शुक्रबार प्रधानमन्त्री सुशील कोइरालासँग छलफल गर्ने लगन जुरेको छ । दुई नेतावीच प्रधानमन्त्री कार्यालय सिंहदरबारमा शुक्रबार बोलाइएको संवैधानिक परिषदको बैठकमा सम्वादको मौका जुरेको हो । शुक्रवार बिहान प्रधानमन्त्रीले बोलाएको संवैधानिक परिषदको बैठकमा विपक्षी दलको नेताको हैसियतबाट दाहालको पनि सहभागिता थियो । बैठकमा सभाध्यक्ष सुवास नेम्वाङसमेत सहभागी भएका थिए । सत्तापक्ष र संविधानसभा अध्यक्षसंग वार्ता नगर्ने उदघोष गरेको एमाओवादी अध्यक्ष औपचारिक रुपमा सभामुख र प्रधानमन्त्री भएको बैठकमा सहभागि भएपछि सो बैठक राजनीतिक छलफलमा केन्द्रीत भएको थियो । संवैधानिक परिषदको बैठकमा लोकसेवा आयोग लगायतका संवैधानिक अंगमा रिक्त रहेका पदहरका विषयमा छलफल गर्ने एजेन्डा थियो ।