एमाओवादीले ससस्त्र युद्ध सुरु गरेको दिन आज

काठमाडौं । तत्कालिन अवस्थामा माओवादीले ससस्त्र युद्धको सुरुवात गरेको दिन हो छ । २० वर्ष अगाडि माओवादीले आजैका दिन अर्थात २०५२ साल फागुन १ गतेदेखि सशस्त्र युद्ध सुरु गरेको थियो । ससस्त्र युद्ध सुरु गरेको दिनको स्मरणमा माओवादीहरुले आज २० औं जनयुद्ध दिवस मनाउँदैछन् । सशस्त्र युद्ध सुरु गर्दाको नेकपा माओवादी पछि ‘एकीकृत नेकपा माओवादी’ नामकरण गरिएपनि शान्ति प्रक्रिया अघि र पछिसँगै टुक्रिएर विभिन्न नाममा माओवादी पार्टी गठन भएका छन् । अहिले पुष्पकमल दाहाल नेतृत्वको एकीकृत नेकपा माओवादी, मोहन वैद्य नेतृत्वको नेकपा–माओवादी र नेत्रविक्रम चन्द नेतृत्वको माओवादीले अलग अलग कार्यक्रम आयोजना गरी शुक्रबार २० औं जनयुद्ध दिवस मनाउने भएका छन् । दिवसका अवसरमा एकीकृत माओवादीले पार्टी केन्द्रीय कार्यालय पेरिसडाँडा कोटेश्वरमा, वैद्य माओवादीले वसन्तपुरमा र चन्दले माओवादीले बालाजु पार्कमा कार्यक्रम आयोजना गरेका छन् । नयाँ जनवादी क्रान्तिको लक्ष्यसहित बन्दुक उठाएर रोल्पा, सिन्धुली र गोरखाका प्रहरी चौकी तथा सरकारी बैंकमा एकसाथ आक्रमण गरी सशस्त्र युद्ध थालेको तत्कालिन नेकपा माओवादीले २०६३ मंसिर ५ गते तत्कालिन सरकारसँग शान्ति सम्झौता गर्दै हतियार बिसाएको थियो । राष्ट्रिय मानव अधिकार आयोगको तथ्यांक अनुसार १० बर्षसम्म चलेको युद्धमा राज्य र विद्रोही दुबै पक्षबाट १७ हजारभन्दा बढी नागरिक मारिए भने हजारौं व्यक्ति घाइते र अंगभंग भएका छन् ।