सत्य निरुपण बेपत्ता आयोगमा नियुक्तीका लागि मन्त्रीपरिषद बस्दै

काठमाडौं । सत्यनिरुपण तथा मेलमिलाप आयोग र बेपत्ता आयोगका पदाधिकारी नियुक्तीका लागि आज मन्त्रीपरिषदको बैठक बस्दैछ । बिहान ११ वजेपछि सिंहदरवारमा बस्ने बैठकले सत्य निरुपण तथा मेलमिलाप आयोग र वेपत्ता आयोगका पदाधिकारी नियुक्त गर्ने एकमन्त्रीले जानकारी दिए । सत्यनिरुपण मेलमिलाप तथा बेपत्ता आयोगका पदाधिकारी सिफारिस समितिले अध्यक्षमा संसदका पूर्व महासचिव एंव पूर्वराजदूत सुर्यकिरण गुरुङको नाम सिफारिस गरेको छ । समितिले सत्य निरुपण तथा मेलमिलाप आयोग र बेपत्ता आयोगका पदाधिकारीको नाम सोमबार प्रधानमन्त्रीलाई बुझाएको हो । समितिले आयोगका सदस्यहरुमा लीला उदासी, प्युठानका श्रीकृष्ण सुवेदी, काठमाडौंकी माधवी भट्ट र महोत्तरीकी मञ्चला झाको नाम सिफारिस गरेको छ । यस्तै बेपत्ता आयोगको अध्यक्षमा पूर्व मुख्य न्यायाधीश लोकेन्द्र मल्लिकको नाम सिफारिस गरेको छ । समितिले बेपत्ता आयोगका सदस्यहरुमा विजुल विश्वकर्मा, प्रा. डा. विष्णु पाठक, नरकुमारी गुरुङ र आइबहादुर गुरुङलाई सिफारिस गरेको हो । विस्तृत शान्ति सम्झौता भएको १० वर्ष बित्न लाग्दा दुबै आयोग गठन गर्ने सरकारी प्रक्रियाले बल्ल मूर्तरुपमा पाउन लागेको हो ।