आन्दोलन छोडेर वार्तामा आउन पौडेलको आग्रह

काठमाडौँ । नेपाली काँग्रेसका उपसभापति रामचन्द्र पौडेलले एमाओवादी सहितको मोर्चालाई आन्दोलन छोडेर वार्तामा आउन आग्रह गरेका छन् । रिपोटर्स क्लब नेपालले पौडेलकै निवास बोहोराटारमा आज आयोजित साक्षात्कार कार्यक्रममा उनले संविधानसभाका माध्यमबाट संविधान ल्याउने नेपाली जनताको चाहनालाई आत्मसात् गर्नुपर्ने बताए । ‘उहाँहरु संविधानसभाको काम कारबाहीबाट बाहिर जानुभएको छ । संविधान राष्ट्रको हितमा हो । आ–आफ्ना कुरा भन्ने केही छैन । सहमतिका लागि हामीहरु खुला दिलले वार्ता गर्न तयार छौँ’, उपसभापति पौडेलले भने । विस्तृत शान्ति सम्झौता र अन्तरिम संविधानको भावना विपरीत आफूहरु नगएको बताउदै उहाँले माघ ५ गते पनि अधिकांश कुरोमा टुङ्गोमा पुगिसकेको अवस्थामा अकस्मात् भइसकेको सहमति अवरुद्ध भएको जानकारी गराए । काँग्रेसले अघि सारेको नौ बुँदे अवधारणा विस्तृत शान्ति सम्झौता र अन्तरिम संविधानको मर्मअनुरुप नै रहेकोमा जोड दिँदै उपसभापति पौडेलले देशको सङ्क्रमणकालको अन्त्य गर्नका लागि तत्काल आन्दोलन छोडेर वार्तामा आउनुको विकल्प नभएको उल्लेख गरे ।