प्रश्नावलीमा राख्ने बिषयका बारेमा विवादपछि उपसमितिको बैठक स्थगित

काठमाडौं । प्रश्नावली निर्माण प्रस्ताव समितिको कार्यविधी बनाउका लागि गठन भएको उपसमितिको बैठकमा प्रश्नावलीमा राख्ने विषयका बारेमा विवाद भएपछि बैठक स्थागित भएको छ । आइतबार बिहान बसेको बैठकमा राप्रपा नेपालले गणतन्त्र, धर्म निरपेक्षता र संघीयताका विषयलाई पनि प्रश्नावलीमा राख्नुपर्ने माग गरेपछि विवाद भएको हो । प्रस्ताव निर्माण समितिको कार्यविधीको मस्यौदाको धारा ६ को ग मा रहेको ‘पहिलो संविधानसभाको पहिलो बैठकबाट पारित भएका संघीय लोकान्त्रिक गणतन्त्र, धर्म निरपेक्षता र समावेशिताको प्रतिकुल नहुने गरी असहमतिका विषयमा सैद्धान्तिक प्रश्नावली सहितको प्रस्ताव निर्माण गर्ने’ भन्ने वाक्यांशमा राप्रपा नेपालका प्रमुख सचेतक दिलनाथ गिरीले असहमति जनाएका थिए । कांग्रेस, एमाले लगायतका दलले अन्तरिम संविधानमा नै उल्लेख भएर सबैले स्वीकार गरेको विषय भएकाले गणतन्त्र, धर्म्निरपेक्षता र संघीयताको विषय प्रश्नावलीमा राख्नु नपर्ने बताएका छन् । यस विषयमा विवाद भएपछि बैठक आइतबार नै दिउँसो सम्मका लागि स्थगित गरिएको छ । राप्रपा नेपालका प्रमुख सचेतक दिलनाथ गिरीले आफुहरुको विषयलाई प्रश्नावलीमा उल्लेख नगरे नोट अफ डिसेन्ट लेख्ने प्रतिक्रिया दिएका छन् । संविधानका विषयमा सहमति र असहमतिका विषयलाई प्रश्नावली बनाउन गठित प्रस्ताव निर्माण समितिको शनिबार बसेकाो बैठकले कार्य्बिधि बनाउन नेपाली कांग्रेसका सभासद रमेश लेखकको संयोजकत्वमा समिति बनाएको थियो । समितिले आइतबार कार्यविधी बनाएपछि प्रस्ताव निर्माण समितिको काम अघि बढ्नेछ ।