गोर्खाल्याण्ड आन्दोलनका नेता सुवास घिसिङको निधन

नयाँदिल्ली । अलग राज्य गोर्खाल्याण्ड आन्दोलनका नेता सुवास घिसिङको विहीवार साँझ निधन भएको छ । नयाँदिल्लीको गंगाराम अस्पतालमा उपचाररत ८४ वर्षीय घिसिङ केही महिनायता समयदेखि घाटीको क्यान्सर र कलेजो सम्वन्धी रोगले थलिएका थिए । अस्पतालको निगरानीमै रहेका घिसिङ दुई दिन अघि सिकिस्त भएपछि भर्ना भएको पारिवारिक स्रोतले जनाएको छ । दार्जिलिङ गोर्खा पावत्र्य परिषदका पूर्व प्रशासक तथा गोर्खा राष्ट्रिय मुक्ति मोर्चाका अध्यक्ष सुवास घिसिङ सन् २००७ का इण्डियन आइडल प्रशान्त तामाङको पक्षमा नलाग्दा दार्जिलिङ छाड्नु परेको थियो । उनी बिमल गुरुङ नेतृत्वको गोर्खा जनमुक्ति मोर्चाको उदयपछि उनी दार्जिलिङवाट विस्थापित वनेका थिए । करिव २ दशकसम्म दार्जिलिङमा एकछत्र राज गर्दै आएका उनी प्रशान्त आइडल बनेका वर्ष दिन पनि बित्न नपाउदै सत्ताच्यूत हुन पुगेका थिए । लगत्तै पत्नी बियोगको पीडा पनि सहन गर्न बाध्य भएका उनी करिव तीन वर्ष जलपाइगुडीमा डेरामा वसेका थिए । एक वर्ष अघि सिलिगुडी नजिकै मतिगढामा डेरामा सरेका थिए । यतिवेला गोर्खाल्याण्डको माग छाडेका घिसिङ छैटौ अनुसूचीको पक्षपाती थिए । सन् १९८० देखि १९८६ सम्म चलेको छुट्टै राज्य गोर्खाल्याण्ड आन्दोलन घिसिङकै नेतृत्वमा भएको थियो । उक्त आन्दोलन हिंसात्मक वन्दा करिव १ हजार २ सय वढीले ज्यान गुमाउनु परेको थियो । गोरामुमोका प्रवक्ता मनजीत सुब्बाले दिएको जानकारी अनुसार अन्त्येष्टिका लागि उनको शव शुक्रवार सिलिगुडी ल्याइने छ ।