सभासद् गृहजिल्लामा : समितिका काम प्रभावित

काठमाडौं । माघ–८ मा संविधान जारी गर्ने म्याण्डेट लिएर निर्वाचित भएका संविधानसभा सदस्यहरु अहिले खाली हात नै भएपनि गाँउ गाँउ जान लागेका छन् । माघ–८ मा संविधान जारी गर्न नसक्दा सहमतिका आधारमा मस्यौदा भएपनि दलहरुले जारी गर्न सकेका भए सभासद्हरु जनताको राय बुझ्ना जनतामा जाने थिए । तर अहिले कांग्रेस–एमालेको मोर्चा र एमाओवादी– मधेशी दलहरुको मोर्चामा बिभाजित भएर संविधान जारी हुन नसक्नुमा एक अर्कोलाई दोष लगाउदै गृह जिल्ला जान लागेका छन् । आफ्ना फरक फरक उद्देश्यका साथ सत्तारुढ र विपक्षी दलका सभासद् गृहजिल्ला जाने क्रम बढेपछि यतिखेर सिंहदरबारमा राजनीतिक चहलपहल कम देखिनुका साथै संसदीय समितिका गतिविधि प्रभावित हुन थालेका छन् । एमाओवादीको संविधानसभा र संसद्का समिति बहिष्कारको घोषणा गर्दै आफ्ना कुरा लिएर जनतामा जाने नीति र प्रमुख सत्तारुढ दल कांग्रेस एमालेले संविधान निर्माणका बारेमा जनतालाई यथार्थ जानकारी गराउने निर्णय गरेपछि सभासद् जिल्ला गएका हुन् । व्यवस्थापिका–संसद्, सामाजिक न्याय तथा मानवअधिकार समितिले परराष्ट्रमन्त्री महेन्द्रबहादुर पाण्डलेलाई आमन्त्रण गरेर आज महत्वपूर्ण विषयमाथि छलफलका लागि बैठक बोलाए पनि बैठक गणपूरक संख्या नपुगेपछि केही ढिला सुरु भएको थियो । समितिमा गणपूरक संख्या नपुगेकाका सम्बन्धमा समितिका सभापति सुशीलकुमार श्रेष्ठले आ–आफ्ना पार्टीका निर्देशन र जिल्लाका योजना छनोटका लागि सभासद् जिल्लामा गएका कारण त्यस्तो अवस्था आएको बताए । सभापति श्रेष्ठले सभासद्ले आवश्यक छलफलका लागि वैधानिक थलो संविधासभा हुँदा हुँदै जिल्लामा जानु उचित नभएको पनि टिप्पणी गरे । सभाध्यक्षको कदमको विरोध गर्दै प्रमुख प्रतिपक्षी एमाओवादीले सरकार र सभामुखलाई असहयोग गर्ने नीतिअनुसार संविधानसभा र व्यवस्थापिका–संसद्का सबै समितिमा उपस्थित नहुने तथा संविधानसभामा भएका गतिविधिका बारेमा जनतालाई जानकारी गराउन जिल्ला जाने निर्णय गरेको नेता अग्निप्रसाद सापकोटाले बताए । त्यस्तै प्रमुख सत्ता घटक काँग्रेस र एमालेले पनि संविधानसभामा भएको यथार्थ जानकारी जनतालाई गराउन जिल्ला जान निर्देशन दिएपछि अधिकांश सभासद् जिल्ला गएका छन् । एमालेका प्रमुख सचेतक अग्नि खरेलले संसदीय दलको बैठकले संविधानसभामा भएको यथार्थ जानकारी जनतालाई गराउनका लागि जिल्ला जान निर्देशन दिएपछि सभासद् ११ दिनका लागि आआफ्ना गृहजिल्ला गएको बताए । नेता खरेलले संविधानसभा, प्रस्ताव समितिमा रहेका सभासद् भने आगामी शनिबार बस्ने बैठकमा उपस्थित हुन आइपुग्ने जानकारी दिए । यसै अवधिमा माघ मसान्तसम्म जिल्ला, नगर तथा वडाबाट योजना तर्जुमा गर्ने अन्तिम समय भएकाले पनि अधिकांश सभासद् आआफ्ना जिल्लामा व्यस्त छन् । सामाजिक न्याय तथा मानवअधिकार समितिको बैठकबाट निस्किएपछि सभासद् कमलाकुमारी घिमिरेले योजना तर्जुमामा भाग लिन आफू आजै जिल्ला जान लागेको बताइन् । सरकारको नेतृत्वकर्ता दल काँग्रेसको संसदीय दलको बैठकले पनि संविधानसभाको बैठक नभएको यस समयमा संविधान निर्माणमा भएका कामकारबाही र संविधानसभामा देखिएको गतिरोधको अवस्था कसरी आयो भन्ने सम्बन्धमा जनतालाई जानकारी गराउन आफ्ना सभासद्लाई जिल्ला जान निर्देशन दिएको प्रमुख सचेतक चीनकाजी श्रेष्ठले बताए । त्यस्तै सिंहदरबार परिसरमा विहविार भेटिएका सद्भावना पार्टीका सहअध्यक्ष लक्ष्मणलाल कर्णले आफू शुक्रबार नै जिल्ला जाने बताउदै पार्टीले जिल्लामा जान निर्देशन दिएका कारण सभासद् जिल्लामा गएको बताए । यसरी विभिन्न उद्देश्यले सभासद् जिल्लामा गएपछि सिंहदरबारमा राजनीतिक चहलपहल कम देखिनाका साथै संसदीय समितिका गतिविधि प्रभावित भएका छन् । यद्यपि संविधानसभाको प्रस्ताव समितिको बैठक भने आगामी शनिबार बस्ने तय भएको संविधानसभा सचिवालयका प्रवक्ता मुकुन्द शर्माले जानकारी दिए ।