वार्ताबाटै समस्याको समाधान गरौं

काठमाडौ । प्रधानमन्त्री सुशील कोइरालाले संविधान निर्माणका सम्बन्धमा देखिएको गतिरोध वार्ता र संवादको माध्यमबाट अन्त्य गरिने बताएका छन् । प्रधानमन्त्री निवास बालुवाटारमा ७५ वटै जिल्लाका कांग्रेसका जिल्ला सचिवका लागि आयोजित चियापान कार्यक्रममा प्रधानमन्त्रीले वार्ताको लागि पहल भइरहेको बताए । कांग्रेसले शासकीय स्वरुप, न्यायप्रणालीजस्ता विवादित विषयमा लचकता अपनाएको भन्दै उनले एमाओवादी र मधेसवादी दललाइ आफ्नो मुद्दाबाटपछि हट्न आग्रह गरे । मुलुकमा अमनचयन, शान्ति, स्थायित्व र विकासका लागि लोकतन्त्र अपरिहार्य हुनेमा जोड दिँदै उनले लोकतन्त्र नमान्ने शक्तिलाई पनि लोकतन्त्रको मार्गमा उन्मुख गराउन आफूहरू लागिपरेको बताए । आन्दोलनले विकासको सम्भावना गुम्ने भन्दै विपक्षीलाई आन्दोलन छाडेर वार्तामा आउनसमेत प्रधानमन्त्रीले आग्रह गरे । कोइरालाले तीन दिनसम्म चलेको जिल्ला सचिवलाई प्रशिक्षण दिने प्रशिक्षकलाई प्रमाणपत्र वितरण पनि गरेका थिए ।