प्रमुखसहित ६ प्राध्यापकले राजीनामा,बीरेन्द्र क्याम्पस ठप्प

चितवन । विद्यार्थी संगठन र क्याम्पस प्रशासनबीचको विवादका कारण चितवनको वीरेन्द्र बहुमुखी क्याम्पस आज ठप्प भएको छ । वीरेन्द्र क्याम्पसमा नेपाल विद्यार्थी संघले कारागारभित्रै आक्रमणमा परी मारिएका शिव पौडेलको स्मृतिमा सरस्वतीको मन्दिर बनाएपछि उत्पन्न विवादले चरम रुप लिएर क्याम्पस ठप्प भएको हो । विवादका कारण क्याम्पसप्रमुखसहित ६ जना प्राध्यापकले सामूहिक राजीनामा दिएका छन् । क्याम्पसमा देखिएको जबर्जस्ती सहन नसकेर राजीनामा दिएको क्याम्पस प्रमुख डा केशवभक्त सापकोटाले बताए । उनीससंगै राजीनामा दिनेमा सहायक क्याम्पस प्रमुख गोविन्द सापकोटा, धर्मबहादुर थापा, खगराज आचार्य, अर्जुनप्रसाद सापकोटा र दयानिधि घिमिरे छन् । उनीहरुले दिएको राजीनामापत्रमा क्याम्पसको जग्गा अतिक्रमण भएको देख्न नसकेर आफूहरुले राजीनामा दिएको उल्लेख छ । एउटा विद्यार्थी संगठनले कसैको नाममा भौतिक निर्माण गरेपछि अरू समूहले पनि यस्ता गतिविधि गर्ने भएकाले यसलाई रोक्न खोज्दा जबर्जस्ती गरिएकाले राजीनामा दिएको डा सापकोटाले बताए । सरस्वती पूजाको दिनमा उक्त मन्दिर अज्ञात समूहले भत्काई दिएको थियो । त्यसपछि वीरेन्द्र बहुमुखी क्याम्पस नेविसंघ इकाई समितिले क्याम्पस प्रशासनले मन्दिर भत्काएको भन्दै आन्दोलन सुरु गरेपछि क्याम्पस बन्द हुन पुगेको हो । सरस्वतीको मन्दिर पुनः निर्माण नभएसम्म आन्दोलन नरोक्ने नेविसंघ इकाई सभापति वचन कार्कीले बताए ।