सभासद्लाई पाँच दिन गाउँ जान कांग्रेसको निर्देशन

काठमाडौं । सत्तारूढ दल नेपाली कांग्रेसले पार्टीका सबै सभासद् र कार्यकर्तालाई पाँच दिन आ–आफ्नो निर्वाचन क्षेत्रमा गएर संविधान निर्माणमा कांग्रेस–एमाले पक्षमा जनमत निर्माण गर्न निर्देशन दिएको छ । एमालेले सवै सभासदलाई गाँ जान निर्देशन दिएको भोलीपल्ट कांग्रेसले पनि आफ्ना सभासदहरुलाई आ–आफ्नो निर्वाचन क्षेत्रमा जान निर्देशन दिएको हो । संविधानसभाले संविधान निर्माणका लागि बहुमतका आधारमा प्रश्नावली समिति गठन गरेको भोलिपल्ट कांग्रेस संसदीय दलको बैठकमा प्रधानमन्त्री कोइरालालले सभासद्हरूलाई निर्देशन दिँदै जिल्लामा गएर पार्टीको धारणबारे प्रचार गर्न निर्देशन गरेका हुन् । बैठकमा कांग्रेसका उपसभापति रामचन्द्र पौडेल र वरिष्ठ नेता शेरबहादुर देउवाले सहमतिका लागि भएका पहलका बारेमा सभासद्हरुलाई जानकारी गराएका थिए । संविधान निर्माण प्रक्रिया अघि बढेको भन्दै वरिष्ठ नेता देउवाले कांग्रेस–एमालेले ल्याएको प्रस्ताव सबैलाई समेटेर समन्वयकारी भूमिकाका लागि ल्याएको हो, विरोध गर्नुको अर्थ नभएको बताएका थिए । संविधान निर्माणको पहिलो पाइलो अघि सरेको भन्दै देउवाले संविधानसभाभित्रका आगामी दिन चुनौतीपूर्ण रहने भएकाले सतर्क भएर अगाडि बढ्नुपर्ने बताए । यस्तै प्रधानमन्त्री कोइरालाले प्रतिपक्षीलाई जसरी भए पनि सहमतिमा ल्याएरै छाड्ने भन्दै एमाओवादीका अध्यक्षसँग वार्ताको थालनी भइसकेको खुलाए ।