नारावाजीका बीच संविधानसभामा प्रश्नावली समिति गठन

काठमाडौं । एकिकृत नेकपा माओवादी नेतृत्वको विपक्षी मोर्चा आवद्ध सभासद्को घेराउ, नाराजुलुस, हुलदंगाबीच सभाध्यक्ष सुवास नेम्वाङले संविधान लेखनको प्रकिया अघि बढाएका छन । संविधानका विवादित विषय प्रक्रियाबाट टुंगो लगाउन नेम्वाङले प्रश्नावली समिति गठन गरेका छन् । समिति गठनका लागि सभाध्यक्ष नेम्वाङले राखेको प्रस्ताव दुईतिहाइभन्दा बढी बहुमतले प्रस्ताव पारित भएको छ । संविधानसभा नियमावलीको नियम ९१ बमोजिम सभाध्यक्षले समितमा रहने सभासद्हरुको नामावली पेस गरेको थिए । सभाध्यक्ष नेम्वाङले बैठकको कारबाही सुरु हुन्छ भन्न नपाउँदै एमाओवादी तथा मधेसी मोर्चासहितका विपक्षी सभासद् दौडेर रोष्ट्रम घेराउ गर्न पुगेका थिए । ७३ सदस्यीय प्रश्नावली समितिको बैठक पाँच दिनपछि बस्ने गरी डाकिएको छ । दलहरुबीच छलफल र सहमतिका लागि सभाध्यक्षले पाँच दिन मौका दिएका हुन । संविधानसभाको बैठक भने अर्को सूचना नआएसम्मका लागि स्थगित भएको छ । शुक्रबारको बैठक स्थगित गर्नुअघि सभाध्यक्ष नेम्वाङले संविधानसभाले बनाएको कार्यसूचीमा सिंगो सभाको काम भएकोले आइतबारको बैठकमा सहमति भए पनि नभएपछि प्रक्रिया सुरु गर्ने स्पष्ट संकेत दिएका थिए । संविधानसभा सचिवालयले गत सोमबारदेखि तयार गरेको प्रश्नावली समितिका लागि प्रस्ताव पेस गर्ने कार्यसूची तयार गरे पनि विपक्षीको अवरोधका कारण संविधानसभा त्यसमा प्रवेश गर्न पाएको थिएन । प्रस्ताव पेस गर्न रोष्ट्रमतर्फ लागेका कांग्रेसका प्रमुख सचेतक चीनकाजी श्रेष्ठलाई विपक्षी सभासद्ले शुक्रबार कब्जामा लिने प्रयास गरेका थिए ।