नेपाल न्युज अष्ट्रेलिया १३ औं वर्षमा 

सम्पादकीय 

अष्ट्रेलियामा रहेका नेपालीहरुलाई समाचार ,लेख रचना र बिज्ञापन मार्फत् सुसुचित बनाउदै आएको नेपाल न्युज अष्ट्रेलियाले आज आफ्नो १२ औ बार्षिकोत्सव मनाउदै छ ।  आजको एक्काईसौ शताब्दिमा कुनै पनि राष्ट्र र समाजको लागि सहि सूचना र जानकारी उपलब्ध गराउने कार्यमा सञ्चार क्षेत्रको भूमिका महत्वपुर्ण रहदै आएको यथार्थतालाई नकार्न सकिदैन । यसैको सेरोफेरोमा रहेर हामीले अष्ट्रेलियाको सिड्नीबाट सन् २०१३ मा नेपाल न्युज अष्ट्रेलियाको प्रकाशन ( सन् २०१८ सम्म मासिक  म्यागेजिन र हाल अनलाईन प्रोटल ) प्रारम्भ गरेका हौ । 

अध्ययन ,रोजगारी तथा ब्यापार व्यवसायमा नेपालीहरुको उपस्थिति र पहुच बढेसँगै यहाँ नेपाली र नेपाली समुदायले भोग्ने बिबिध समस्या हरुलाई उजागर गरेर यहाँको स्थानिय सरकार र राष्ट्रिय सरकार सम्म नेपालीको आवाज पुर्याउन सके समन्धित निकायले समस्या समाधानमा सहयोगी भूमिका खेल्न सक्छ भन्ने बिस्वास र भरोशा बोकेर हामीले नेपाल न्युज अष्ट्रेलियालाई यहाँको नेपाली समुदाय माझ ल्याएका हौ । 
सामाजिक सञ्जालको बिकास अनि विस्तारले छापा पत्रकारिता मात्रै होइन समग्र पत्रकारिता नै ओझेलमा पर्न गएको यथार्थ पृष्ठभूमिमा उभिएर सच्चा संचारकर्मीको धर्म निर्वाह गर्न कम्ति कठिन छैन । आजको पत्रकारिताले समाजलाई डोर्याउने कि सामाजिक सन्जालको चंगुलमा पर्दै गएको समाजको पछिपछि  पत्रकारिता जाने भन्ने बिषयले महत्व पाउदै गएको छ । यस्तो अवस्थामा पत्रकारितालाई सहि मार्गमा डोर्याउन के समाचार हो र के बिज्ञापन हो भन्ने कुराको जानकारी समाजले राख्न सक्नुपर्छ । समाजले जव  ठिकलाई ठिक र बेठिकलाई बेठिक भन्ने नैतिक साहस बटुल्छ तव पत्रकारितालाई सहि बाटोमा लैजान सहज हुन जान्छ । समाचार दिने नाउमा हामी बोल्दाबोल्दै र लेख्दालेख्दै बिक्ने समाचार होइन चिरकालसम्म टिक्ने समाचार दिएर समाजलाई सुसुचित गर्दै आएका छौ । हामी समाजको अभिन्न अङ्ग बनेर समाजका गतिविधिहरुलाई सार्वजनिक गरेर समाजलाई सुसुचित बनाउने कार्यमा पत्रकारिताको अन्तराष्ट्रिय मूल्य र मान्यता अनि आफ्नो ब्यबसायिक मर्यादालाई कायम राख्दै आएका छौ । 
 हामीले पाठक र स्रोतालाई पस्कने समाचारमा सुद्दता ,विश्वसनीय ,सन्तुलित हुनुपर्दछ भन्ने पत्रकारिताको बिश्वब्यापी मान्यतालाई शिरोधार्य गर्दै आजसम्मको यात्रा तय गर्दा विभिन्न बाधा अबरोध र कठिनाई भोगेका छौ । जसले हामीलाई अगाडी बढ्ने थप प्रेरणा र उर्जा दिएको हामीले अनुभव गरेका छौ र यो हाम्रो लागि जीवनबुटी बनेको छ । हाम्रो यहाँसम्मको यात्रालाई साथ सहयोग र हौसला दिनुहुने आदरणीय पाठकवर्ग ,बिज्ञापनदाता र शुभचिन्तकहरुप्रति हार्दिक आभार र कृतज्ञता व्यक्त गर्दै आगामी दिनहरुमा पनि यहाँहरुको साथ र सहयोग रहिरहने बिश्वास लिएका छौ ।