एक्सपर्ट नवाज कपको उपाधि बेनीलाई 

सीडनीमा सन्चालन भैरहेको एक्सर्पट नवाज कप फुटबल प्रतियोगिताको उपाधि बेनी फुटबल क्लबले जितेको छ । आइतबार सम्पन्न फाइनल खेलमा प्रतिद्धन्द्धी फेवा एफसीलाई टाइब्रेकरमा पराजित गर्दै बेनीले उपाधि हात पारेको हो । बिश्वकपको माहौल चलिरहेको बेला सीडनीमा नेपाली फुटबल क्लबहरुको भिडन्त हेर्न लायक रहयो । निर्धारित समयसम्म एक एक गोलको बराबरीमा रहेको खेल अन्तत टाइब्रेकरमा पुगेपछि फेवाका खेलाडीहरु पेनाल्टीमा चुकेका थिए । प्रारम्भमा लयमा देखिएको फेवाले पहिलो गोल गर्दै अग्रता लिएपनि नेपालका अनुभवी युवा खेलाडी सम्मिलित बेनीवाट सुमन अर्यालले बराबरी गोल गरेपछि खेल रोमान्चक मोडमा पुगेको थियो । 
टाइब्रेकरमा भने बेनीका गोलरक्षकले फेवाका दुई पेनाल्टी सेभ गरेपछि खेल बेनीको पक्षमा पुगेको थियो । 
भेट्रानतर्फ भने मकार्थर नेप्लीज क्लबले सेन्ट जोर्जलाई टाइब्रेकरमा हराउदै उपाधि जितेको छ । निर्धारित समय एक एक गोलको बराबरीमा चलेको खेल टाइब्रेकरमा पुगेपछि मकार्थरले बाजि मारेको थियो । सेन्ट जोर्जवाट नेपालका अनुभवी राष्ट्रीय खेलाडी अनिल ओझा मैदानमा देखिएका थिए ।
प्रतियोगिताको उत्कृष्ट खेलाडीको उपाधि अजय तामाङले जिते भने उच्च गोलकर्ताको शिल्ड सन्जिव बिष्टको नाममा रहयो । प्रतियोगिताको उत्कृष्ट गोलरक्षकको पुरस्कार आकाश रानाभाटले हात पारेको आयोजक समितीका संयोजक बैकुन्ठ डंगोलले जानकारी दिए । 
प्रतियोगिताका विजेता खेलाडीहरुलाई कम्बरल्यान्ड सीटी काउन्सिलका काउन्सिलर स्टीभ क्रीष्टीउ, पुर्व बाणिज्यदुत सन्जिव शर्मा , प्रायोजक एक्सपर्ट एजुकेशनका प्रमुख बद्री अर्याल, बरउड काउन्सिलका काउन्सिलर सुकृती भट्ट , डाक्टर प्रबिण पाठक, प्राध्यापक कृष्ण श्रेष्ट, डा राजु मानन्धर एनआरएनका सचिब कल्याण खड्का, कोषाध्यक्ष निजन चौलागाई, एन्जा अध्यक्ष कृष्ण तिवारी, लगायतले ट्रफी ,पदक तथा पुरस्कार प्रदान गरे । आयोजक नवाजका अध्यक्ष चिरन तिवारीले समाजलाई जोडने र युवाहरुलाई अनुशासनमा बाध्ने महत्वपुर्ण अंगका रुपमा रहेको खेलुकदलाई अगाडि बढाउने अभियानमा आफनो संस्था लागि परेको बताए ।