क्रिकेटमा भारतसंग नेपाल २३ रनले पराजित

नेपाल न्युुज संवाददाता

काठमाडौं । एसियाली खेलकुदअन्तर्गत पुरुष क्रिकेटको क्वार्टरफाइनलमा भारतसग नेपाल २३ रनले पराजित हुन पूगेको छ । यो नेपाल र भारतबीचको पहिलो टी–२० अन्तर्राष्ट्रिय खेल थियो । यसअघि नेपालले एसिया कपमा भारतसग पहिलो एकदिवसीय खेल पनि खेलेको थियो । टस जितेर पहिले ब्याटिङ गरेको भारतले ४ विकेटको क्षतिमा २०२ रन जोड्यो ।

मंगलबार झेजियाङ युनिभर्सिटी अफ टेक्नोलोजी पिङफेङ क्रिकेट फिल्डमा भारतले दिएको २०३ रनको लक्ष्य पछ्याएको नेपालले ९ विकेटको क्षतिमा १७९ रन जोड्न सफल भयो ।नेपालका ओपनरद्वय कुशल भुर्तेल २८ रन र आसिफ शेख १० रनमा आउट भए । कुशल मल्लले २२ बलमा २ चौका र २ छक्काको मद्दतमा २९ रन बताए । रोहित पौडेल ३ रनमा आउट हुदा दीपेन्द्रसिंह ऐरीले १५ बलमा ४ छक्का हिर्काउदै ३५ रन बनाए । ऐरीले १४ ओभरमा शिवम् दुवेलाई लगातार ३ छक्का प्रहार गरे ।सोमपाल कामी ७, गुल्सन झा ६ रन र सन्दीप लामिछाने ५ रनमा आउट भए । करण केसीले १३ बलमा नटआउट १८ रन जोड्दा १ चौका र २ छक्का प्रहार गरे ।

खेलमा नेपालले भारतविरूद्ध १४ छक्का र ११ चौका हिर्काएको थियो ।बलिङमा भारतका रवि बिश्नोइ र आवेश खानले ३–३ विकेट लिए । अर्शदीप सिंहले २ विकेट लिन सफल भए ।टस जितेर पहिले ब्याटिङ गरेको भारतले ४ विकेटको क्षतिमा २०२ रन जोड्यो।भारतका लागि यशस्वी जैशवालले शतक प्रहार गरे । उनले ४९ बलमा ८ चौका र ७ छक्का प्रहार गरे। शतक प्रहार गरे लगत्तै जैशवाल दीपेन्द्रको बलमा रोहितबाट विकेट पछाडि क्याच भए ।यस्तै रिंकु सिंह ३७ रन र शिवम् दुवे २५ बलमा नटआउट रहे।भारतका कप्तान रूतुराज गायकवाडलाई दीपेन्द्रसिंह ऐरीले २५ रनमा आउट गरे ।

यस्तै तिलक बर्मालाई सोमपाल कामीले २ रनमा बोल्ड गर्दा सन्दीप लामिछानेले जितेश शर्मालाई ५ रनमा आउट गरे।बलिङमा नेपालका दीपेन्द्रसिंह ऐरीले २ विकेट लिए ।नेपाल समूह ‘ए’ को विजेता बन्दै अन्तिम आठमा पुगेको हो ।
भारत, पाकिस्तान, श्रीलंका, बंगलादेश र अफगानिस्तान भने वरीयताका आधारमा सिधा अन्तिम आठमा पुगेका थिए ।